Выстава графікі Сяргея Балянка «Гэтак жа, як і заўтра» ў Мінску

У сераду, 19 лютага, у галерэі Шчамялёва адкрываецца выстава графікі Сяргея Балянка «Гэтак жа, як і заўтра».

На выставе — больш за 50 графічных работ. Сярод іх нямала даволі лаканічных кампазіцый, але адчування пустаты ці недасказанасці няма.

Свет, вытканы з ломкіх ліній, вобразы, вытканыя з тонкіх нітак. Далікатныя карцінкі памяці. Менавіта так хочацца апісаць графіку Сяргея Балянка.

Яго афорты — зусім не вобразы канкрэтных прадметаў. Гэта, хутчэй, уражанні, успаміны, адчуванні, якія прынялі розныя формы і гэтыя формы адлюстраваны ў працах мастака.

Глыбока суб’ектыўныя і назовы прац, якія як раз пацвярджаюць абсалютную невідавочна сэнсаў: «Яны заўсёды ведалі дарогу да цёмнага святла», «Пастаянна дзеючы гіпсавы атракцыён», «Пакуль усё гэтак жа, як учора і як заўтра».

Узнікае адчуванне, што гледача дапусцілі ў вельмі асабістую прастору і зусім не прапануюць разважаць і шукаць якія-небудзь падтэксты. Тут усё ўжо прыдумана, усе карцінкі памяці захаваны, падпісаны і не патрабуюць дадатковых характарыстык.

Аднак, тым мацней спакуса паразважаць, пафантазіраваць і, такім чынам, або павысіць градус загадкавасці, або адмяніць яго зусім.



Выстава працуе па 23 сакавіка.