18 снежня ў 16.00 у Гомельскай абласной універсальнай бібліятэцы імя. У.І. Леніна адкрыецца персанальная выстава інтуітыўнага жывапісу Святланы Каласковай-Чаплінскай «Падарожжа душы».
У праграме адкрыцця выставы – перформанс акцёраў пантамімы “Арлекін і П’еро паміж явай і выдумкай», выступ актрысы Гомельскага моладзевага тэатра Наталлі Голубевай, майстар-клас Святланы Каласковай-Чаплінскай.
Святлана Каласкова-Чаплінская скончыла найстарэйшую мастацкую навучальную ўстанова Літвы – Каўнаскі тэхнікум прыкладнога мастацтва ім. Стэпаса Жукаса, са студэнцкіх гадоў працавала актрысай Каўнаскага тэатра пантамімы. Пасля пераезду ў Гомель Святлана стала дызайнерам па шкле ў ПА «Карал». Акрамя асноўнай дзейнасці на прадпрыемстве займалася рэстаўрацыйнай працай, па яе праекту і пры яе непасрэдным удзеле былі створаны свяцільні ў сабор Святых Пятра і Паўла, пазней, працягнуўшы супрацоўніцтва, для Гомельскай епархіі мастачка пісала копіі абразоў. У 90-я гады Каласкова-Чаплінская стварыла пры Беларускім таварыстве глухіх тэатр пантамімы – студыю «Алегорыя», рэжысёрам якога яна з’яўлялася 12 гадоў.
Сёння адно з асноўных заняткаў Святланы – жывапіс. Мастачка працуе ў тэхніцы інтуітыўнага жывапісу. На яе рахунку выставы ў многіх краінах, карціны знаходзяцца ў прыватных калекцыях практычна па ўсім свеце. У сталіцы Малайзіі, Куала-Лумпуры, карціны Каласковай-Чаплінскай упрыгожылі інтэр’еры рэстаранаў, дзелавых цэнтраў і гасцініц, знайшлі сваіх гаспадароў у каралеўскім двары, у рускай амбасадзе.
Свае працы мастачка экспануе ў Гомелі і Беларусі ўпершыню. Штогадовыя паездкі ў Малайзію, знаёмства з іншай культурай, экзатычнай прыродай гэтай краіны знаходзяць адлюстраванне ў стылістыцы яе незвычайных карцін. Яе карціны, напоўненыя яркімі вобразамі, раскрываюцца як рэбусы-загадкі. Тонкі, эмацыйны жывапіс здольны распавесці аб падарожжах душы, аб сувязях паміж часам і эпохамі, пра ўвасабленне пачуццяў у розных формах і прасторах.
