Выстава «Віцебская акварэль» у Віцебску

 

У аўторак, 13 траўня, у віцебскім абласным краязнаўчым музеі пачынае працу выстава «Віцебская акварэль».

Працэс станаўлення акварэльнай школы ў Беларусі вызначыўся ў другой палове 1960-х гг., але акварэль на Віцебшчыне мае глыбокія гістарычныя карані. Успомнім серыю пейзажаў Віцебска, якія выканалі мастакі Юзаф Пешка і Напалеон Орда.

У 1910-1920-я гг. да акварэлі звяртаюцца вучні школы Юрыя Пэна — Марк Шагал і Давід Якерсон.

Новым вітком развіцця акварэльнай школы сталі 1950-я гг., калі Іван Сталяроў змог прывіць любоў да акварэлі многім сваім студэнтам.

Адным з яго вучняў стаў таленавіты Фелікс Гумен, які першым у Савецкім Саюзе напісаў і з бляскам абараніў дыпломны праект акварэллю.

З таго часу шэраг віцебскіх акварэлістаў папаўняецца вучнямі Івана Сталярова і Фелікса Гумена, а затым вучнямі іх вучняў. Так узнікла дзіўная з’ява, якую па праве можна назваць «віцебскай школай акварэлі».

З сярэдзіны 1960-х гг. віцебскія таленавітыя акварэлісты Іван Сталяроў, Генадзь Шутаў, Віктар Лук’янаў, Вікенцій Ральцэвіч, якія ўдзельнічалі ў выставах, прыцягнулі да акварэлі вялікую ўвагу публікі, павысілі яе статус у вачах знаўцаў і знатакоў.

Грамадскае аб’яднанне «Віцебская акварэль», ідэйным натхняльнікам якога стаў віцебскі мастак Міхаіл Ляўковіч, створанае ў 1995 годзе, прадстаўляла 32 майстроў розных узростаў і творчых лёсаў.

На выставе прадстаўлена больш за 80 твораў мэтраў віцебскай акварэлі і сучасных мастакоў.