19 траўня музеі Янкі Купалы і Якуба Коласа, карыстаючыся тым, што абодва нашыя песняры — аднагодкі, адкрываюць сумесную выставу «Янка Купала і Якуб Колас. Досціпы ад класікаў» з нагоды 140-годдзя з дзён іх нараджэння.
Дата: 19 траўня
Час: 17.00
Месца: літаратурны музей Янкі Купалы, вул. Янкі Купалы, 4, Мінск
Янка Купала і Якуб Колас нарадзіліся ў адзін год, у іх жыццёвым шляху было шмат агульных момантаў: жыхарства ў Вільні і Мінску, праца ў «Нашай Ніве», Інстытуце Беларускай Культуры, Акадэміі навук Беларусі. Абодва былі сведкамі І і ІІ Сусветных войнаў.
Абодвум было ўласціва пачуццё гумару ў жыцці і майстэрства іроніі ў творчасці, пра што сведчаць шматлікія ўспаміны сучаснікаў паэтаў і іх творы. Досыць падстаў, каб паглядзець на іх жыццё і сяброўства праз прызму іх гумару.
У экспазіцыі — рукапісы твораў і прыжыццёвыя выданні, фотаздымкі, прысвечаныя паэтам шаржы мастакоў, меморыі — сведкі жартоўных выпадкаў з жыцця Янкі Купалы і Якуба Коласа, вядомых з успамінаў сучаснікаў і нашчадкаў.
Выстава працуе па 30 ліпеня.
