29 красавіка ў філіяле Веткаўскага музея ў Гомелі адкрыецца новая выстава «Жывая вада», прысвечаная сімволіцы і значэнню вады ў беларускіх звычаях і традыцыях.
Дата: 29 красавіка
Час: 16.00
Месца: філіял Веткаўскага музея, пл. Леніна, 4А, Гомель
Культура любога старажытнага народа ўстойліва ўспрымала ваду, як крыніцу жыцця і сімвал жыццядайнасці. Навукаёмістая фраза «чалавек на 80 працэнтаў складаецца з вады» без супярэчнасці падцвярджаецца радкамі з Евангелля, дзе Хрыстос, ў бяседзе з самаранкаю сведчыць аб крыніцы вады жывой, якая бруіцца ўнутры чалавека.
Безумоўна, гаворка ідзе аб розных узроўнях успрыяцця: матэрыяльнам і духоўным — культура якраз і займаецца іх ўраўнаважаннем і вызначэннем прыярытэтаў.
Выстава прысвечана гэтай шматстайнай з’яве: вада ў помніках мастацкай культуры і вуснай творчасці, яе багаслоўскія аспекты і народныя звычаі.
Супрацоўнікі музея дастаткова паездзілі па населеных пунктах рэгіёну, каб цяпер мець мажлівасць падзяліцца сваімі ўражаннямі, запісамі, назіраннямі.
