Юбілейная вечарына. «Генадзь Бураўкін. Мой боль і запавет...»

Дзяржаўны музей гісторыі беларускай літаратуры запрашае ўсіх аматараў творчасці Генадзя Бураўкіна на сяброўскую паэтычную вечарыну, прымеркаваную да 85-годдзя з дня нараджэння паэта. 

Дата: 29 верасня.

Час: 17.30

Месца: Дзяржаўны музей гісторыі беларускай літаратуры, вул. М.Багдановіча, 13.  

Уваход вольны.

Генадзь Бураўкін – паэт, журналіст, дыпламат, адзін з яркіх і самабытных прадстаўнікоў пасляваеннага пакалення. Лаўрэат Дзяржаўнай прэміі імя Янкі Купалы за кнігу вершаў «Варта вернасці» (1980). Першыя вершы надрукаваў у 1952 годзе ў полацкай газеце «Сцяг камунізма». Перакладаў на беларускую мову вершы рускіх, украінскіх, малдаўскіх, балгарскіх паэтаў. Укладальнік кнігі «Наш Быкаў» – першай кнігі ўспамінаў пра Васіля Быкава.

На вечарыне ўпершыню будуць экспанавацца скульптурныя работы Эдуарда Астаф’ева, прысвечаныя Генадзю Бураўкіну.

Падчас мерапрыемства будуць прадстаўлены цікавыя матэрыялы з архіва паэта, якія Юлія Якаўлеўна Бураўкіна (удава паэта) перадала ў фонды музея.


Паверце,
Мне для шчасця трэба
Зусім нямнога, далібог:
Высокае святое неба
І разняволенасць дарог,
Запрацаваны хлеб жытнёвы,
Галоўка ўнука пад рукой,
І асалода роднай мовы,
І краю роднага спакой,
Куст ядлаўцовы ля парога,
Глыток крынічнае вады…
І не хачу я больш нічога
На ўсе апошнія гады.
(Г.Бураўкін)