Беларусы заўсёды казалі “смяяцца – не грэх”, бо ведалі смех працягвае жыццё, дапамагае змагацца з непрыемнасцямі, а ўсмешка спрыяе наладжванню сяброўства і прыемных ўзаемаадносін. І, нават, крытычныя заўвагі ў бок чалавека, калі прамаўляюцца з гумарам, успрымаюцца не так востра і балюча.
Аляксандр Каршакевіч – беларускі карыкатурыст, прызнаны майстра ў галіне сяброўскага шаржу. Выпускнік Мінскага мастацкага вучылішча імя А. К. Глебава, вось ужо 33 гады ён працуе ў часопісе “Вожык”, галоўным беларускім альманаху сатыры і гумару. У творчым багажы Аляксандра Пятровіча – коміксы, ілюстрацыі да дзіцячых выданняў, карыкатуры.
Але сапраўдную вядомасць Аляксандру Каршакевічу прынеслі менавіта шаржы, галоўнымі героямі іх сталі дзеячы сучаснай культуры Беларусі – паэты, празаікі, акцёры, рэжысёры, калегі-мастакі і сябры. Мастака выдзяляе тонкае пачуццё гумару, далікатныя адносіны да героя. Таму няма пакрыўджаных, абражаных, наадварот, толькі светлыя ўсмешкі з’яўляюцца на тварах тых, хто знаёміцца з работамі майстра.
Запрашаем на прэзентацыю шаржаў Аляксандра Каршакевіча, пад час якой будзе магчымасць сустрэцца з Аўтарам і яго Героямі, даведацца, як адбываецца творчы працэс стварэння такіх работ. Гасцей імпрэзы чакаюць сюрпрызы і прыемныя адкрыцці!
Да сустрэчы!
Літаратурны музей Максіма Багдановіча
г.Мінск, вул. М.Багдановіча, 7а
тэл. 334 07 61, 334 42 69
