21 лютага — адзначаецца Міжнародны дзень роднай мовы. Зрабілі для вас падборку беларускіх мерапрыемстваў, якія будуць праходзіць у розных гарадах свету з нагоды Дня роднай мовы, каб вы маглі годна адзначыць гэтае свята.
Анлайн
Агульнанацыянальная анлайн-дыктоўка у Дзень роднай мовы
![Afiša Afiša](/upload/medialibrary/1f2/prpyzenkj4hjpu793g1ruwe4ar8nwr8i.jpg)
Музей Вольнай Беларусі, НАУ і Прадстаўніцтва па нацыянальным адраджэнні запрашаюць беларусаў з усіх куткоў свету ўзяць удзел у АГУЛЬНАНАЦЫЯНАЛЬНАЙ АНЛАЙН-ДЫКТОЎЦЫ!
Сёлета дыктоўка прымеркаваная да 100-годдзя з дня нараджэння народнага пісьменніка Беларусі Васіля Быкава, які лічыў, што лёс беларускай мовы неразрыўна звязаны з незалежнасцю нашай краіны: «Будзе незалежнай Беларусь ‒ будзе ўсё. У тым ліку мова і культура».
І сёння, калі перад беларусамі асабліва востра стаяць пытанні абароны незалежнасці, а значыць, і захавання мовы, мы ні ў якім разе не павінны забываць пра гэтыя мудрыя словы нашага славутага пісьменніка.
Далучайцеся да трансляцыі, дзе б вы ні былі!
Беларусь
Мінск
Гутарка на тэму: «Размова пра мовы»
Ужо ў гэты панядзелак, 19 лютага, адбудзецца гутарка на тэму: «Размова пра мовы».
Веды — гэта тое, што дае нам упэўненасць у сабе і ў сваіх сілах. Веданне замежных моў — гэта інструмент, з дапамогай якога мы адкрываем дзверы ў свет. Мы можам знайсці працу або пазнаёміцца з цікавымі людзьмі, падарожнічаць і ствараць музыку, тэксты і г.д.
Таксама пагаворым пра ваш шлях да роднай мовы. Як вы яе ўдасканальваеце, якія інструменты для гэтага выкарыстоўваеце? Будзем дзяліцца досведам і натхняць адзін аднаго.
Запісацца на гутарку можна па спасылцы.
Моўныя гулі да Дня роднай мовы ў Мінску
![Afiša Afiša](/upload/medialibrary/8eb/r15xiczb3lk9mri4la0y2dwah29o9dd6.jpg)
У сераду, 21 лютага, у музеі Максіма Багдановіча ладзяць «Моўныя гулі» — несур’ёзныя спаборніцтвы да Дня роднай мовы.
Якім чынам самы малады класік нашай літаратуры засвоіў беларускую — застаецца таямніцай. Ці не забыліся на беларускую мову мы — таксама не зразумела.
Супрацоўнікі музея прапануюць разам пашукаць адказы на першае пытанне і зладзіць іспыт па другім.
Каламбуры, загадкі, рэбусы, анаграмы — якіх толькі забавак не прыдумлялі з выкарыстаннем слова.
Крыху ведаў, кемлівасці, ініцыятывы, удачы — і вы зможаце справіцца з нашымі дураслівымі, але вельмі сур’ёзнымі заданнямі.
Удзельнікаў чакаюць сувеніры ад музея Максіма Багдановіча і кнігі ад грамадскай ініцыятывы «БЕЛГІПС».
Беларуская дыктоўка ў Мінску
У сераду, 21 лютага, Інстытут мовазнаўства імя Якуба Коласа Цэнтра даследаванняў беларускай культуры, мовы і літаратуры НАН Беларусі, ладзіць Беларускую дыктоўку да Дня роднай мовы.
Напісаць дыктоўку можна афлайн у Цэнтральнай навуковай бібліятэкі імя Коласа НАН Беларусі.
А можна далучыцца да анлайн-трансляцыі на сайце «Культура» Беларускага радыё www.radiokultura.by альбо на хвалі радыё 102.9 FM.
Брэст
Тыдзень роднай мовы ў Брэсце
У берасцейскай абласной бібліятэцы праходзіць Тыдзень роднай мовы.
Штодня тут цікавыя імпрэзы, якія дапамогуць вам паглыбіцца ў беларушчыну: ад літаратурнай гульні да квіза.
Праграма:
17 лютага аб 11.00 — віктарына «Сваімі словамі»
18 лютага аб 11.30 — літаратурная гульня «Я мову родную люблю»
19 лютага — інтэлектуальна гульна «Культурныя вандроўкі»; пазнавальная гадзіна «Традыцыі роду — традыцыі народу» (па папярэнім запісе)
20 лютага аб 11.30 — акцыя «Кніжнае канфеці»; квіз «Брэст: ад мінулага да сучаснасці» (па папярэднім запісе)
21 лютага — творчая сустрэча з пісьменнікам-земляком Анатолем Брытуном
Цягам тыдня адкрытая кніжная выстава «Дзіўная родная мова».
Месца: Абласная бібліятэка імя Горкага, вул. Куйбышава, 32, Брэст
Віцебск
Беларуская дыктоўка ў Віцебску
У сераду, 21 лютага, у абласной бібліятэцы — Беларуская дыктоўка да Дня роднай мовы.
Вас чакае літаратурна-музычная вечарына і агульная дыктоўка, якая традыцыйна ладзіцца ў гэты дзень.
Вялікабрытанія
Лондан
Дзень Роднай мовы з Хадановічам у Лондане
24 лютага Англа-беларускае таварыства сардэчна запрашае на традыцыйнае святкаванне Міжнароднага дня роднай мовы ў Лондане.
Сёлетні Дзень роднай мовы прыпадае на другую гадавіну вайны ва Ўкраіне і прысвячаецца гераічнаму змаганню ўкраінскага народа за свабоду і захаванне сваёй палітычнай і культурнай ідэнтычнасці.
Госцем будзе Андрэй Хадановіч, вядомы паэт і перакладнік. На сустрэчы ў падтрымку ўкраінскага народу будуць прачытаныя вершы Сяргія Жадана, а таксама арыгіналы вершаў на розных мовах у перакладах Андрэя Хадановіча і ягоную ўласную паэзію. Будуць і спевы – песні, перакладзеныя знакамітым госцем на беларускую мову: «Разбуры муры турмы», «Чуеш як ідзе народ?», «Алілюя», «The Fields of Athenry...».
Удзельнікі сустрэчы змогуць набыць зборнікі паэзіі і перакладаў Андрэя Хадановіча.
Грузія
Тбілісі
Святочная «Мова Нанова» ў Тбілісі
![Afiša Afiša](/upload/medialibrary/a94/95gyrz3tyn11z9dt6u42g1uicoa0wu3t.jpg)
У панядзелак, 19 лютага, «Мова Нанова ў Тбілісі» кліча на святочную сустрэчу, прысвечаную Тыдню роднай мовы.
На сустрэчы:
пагавораць пра гісторыю беларускай мовы, адкуль і калі яна ўзнікла;
напішуць невялічкую дыктоўку;
правераць разам і прааналізуюць тэкст з пункту гледжання граматыкі, каб падмацаваць свае веды;
паспяваюць любімыя беларускія песні пад гітару са спадаром Алесем!
Выкладчыца — спадарыня Кацярына, беларусістка, настаўніца Першай беларускай анлайн-школы ва Украіне.
Удзел бясплатны. Запісвайцеся па спасылцы і далучайцеся!
Літва
Вільня
Дзень роднай мовы ў Вільні
![Afiša Afiša](/upload/medialibrary/132/fkb20kzmejmnyp4ui3ttczkpe9c2lgxu.jpg)
У сераду, 21 лютага, у Цэнтры беларускай супольнасці і культуры адзначаюць Дзень роднай мовы.
У праграме:
Беларуская дыктоўка па творах Васіля Быкава
Лекцыя Вінцука Вячоркі «Васіль Быкаў і беларуская мова»
Прагляд дакументальнага фільма.
Прыходзьце ж і вы напісаць агульнабеларускую дыктоўку ды ўшанаваць памяць пісьменніка.
Польшча
Беласток
Дзень роднай мовы ў Беластоку
21 лютага Хаб «Новая Зямля» запрашае далучыцца да святкавання Дня роднай мовы.
У праграме:
Дыктоўка. Тэкст Васіля Быкава. Сёлета яму спаўняецца 100 год. Дыктуе Кацярына Ваданосава. Тыя, у каго не атрымаецца з далучыцца ў хабе, зможа пісаць анлайн, даяднаўшыся да стрыма на youtube канале Мова Нанова.
Квіз, адмыслова падрыхтаваны Падлеткавым Клубам.
Беларускія вершы ад дзетак і ўсіх жадаючых.
Варшава
Тыдзень Роднай Мовы ў Варшаве
З 19 да 23 лютага ў Варшаве пройдзе цэлы шэраг мерапрыемстваў, прысвечаных Дню Роднай мовы.
Штодня будуць тэматычныя івэнты:
19 лютага 18:30 — Абмяркаванне беларускай мовы ў музыцы. Дыскусію правядзе Аляксандр Чарнуха з удзелам Navi Band
20 лютага 18:40 — Тэматычная гульня «Што? Дзе? Калі?» па-беларуску
21 лютага — Дзень Роднай мовы! — 18:30 — Паэтычны вечар з удзелам беларускіх літаратараў і адкрыты мікрафон для ўсіх жадаючых
22 лютага 18:30 — Wyspa — падлеткавы клуб, сустрэча прысвечана дню роднай мовы
23 лютага 19:30 — «Пазакласнае чытанне» з комікамі аб’яднання Pan Standup — разбор кніжкі!
«Беларуская музыка — гэта толькі па-беларуску?»: сустрэча з Аляксандрам Чарнухам у Варшаве
У панядзелак, 19 лютага, у Беларускім Моладзевым Хабе — сустрэча з Аляксандрам Чарнухам у межах Тыдня роднай мовы.
Пытаннечка ў загалоўку хвалюе не першае пакаленне творцаў. Ці ёсць на яго ўцямны адказ? Будуць разбірацца!
Аўтар YouTube-каналу «Міністэрства сепультуры», музычны журналіст Аляксандр Чарнуха і музыкі гурта NaviBand разам паразважаюць пра ролю мовы ў музыцы, а вы зможаце да іх далучыцца.
Дзень роднай мовы ў Варшаве
У сераду, 21 лютага, у Беларускім Моладзевым Хабе святкуюць Дзень роднай мовы.
Госці і артысты падзеляцца сваёй творчасцю, а іх выступы нагадаюць нам пра багацце і разнастайнасць нашай мовы: Удзел бяруць Алесь Плотка, Васіль Ядчанка, Віталь Рыжкоў, Алесь Дзянісаў, Atesta.
Будзе таксама адкрыты мікрафон, дзе кожны ахвотны зможа падзяліцца сваімі думкамі, вершамі ці адчуваннямі на беларускай мове.
Лодзь
Беларуская дыктоўка ў Лодзі
У сераду, 21 лютага, беларусы Лодзі далучаюцца да Беларускай дыктоўкі ў Дзень роднай мовы.
Сёлета Прадстаўніцтва па нацыянальным адраджэнні Аб’яднанага пераходнага кабінета разам з Радай Беларускай Народнай Рэспублікі прапануюць для дыктоўкі тэкст, прымеркаваны да 100-годдзя з дня нараджэння народнага пісьменніка Беларусі Васіля Быкава.
То прыходзьце і вы напісаць!
Беларуская дыктоўка з Ганнай Янкутай у Познані
У сераду, 21 лютага, у Познані таксама пішуць дыктоўку да Дня роднай мовы.
Сёлета тэкст будзе прымеркаваны да 100-годдзя з дня нараджэння народнага пісьменніка Беларусі Васіля Быкава.
У Познані дыктоўку прачытае пісьменніца і преракладчыца Ганна Янкута, аўтарка рамана «Час пустазелля» і дзіцячых гісторый пра Ката Шпорта.
Імпрэза працягнецца творчай сустрэчай з шаноўнай госцяй.
Эстонія
Тарту
Дзень роднай мовы ў Тарту
У сераду, 21 лютага, беларусы Эстоніі збіраюцца на сустрэчы ў Тарту, каб адзначыць Дзень роднай мовы.
У праграме:
вечаровыя чытанні паэзіі і прозы, з таршэрам
трошкі музыкі і спеваў з гітарай
віктарыны для дзяцей і дарослых з прызамі
кава і гарбата з прысмакамі
У кожнага жадаючага будзе магчымасць выступіць: прачытаць верш, падзяліцца улюбёным урыўкам з кнігі ці заспяваць песню.
Больш беларускіх падзеяў шукайце ў нашай Афішы.
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
Карыстацца ім вельмі проста: выбірайце той ці іншы горад або ўсю краіну, падпісвайцеся асобна на ўсе анлайн-мерапрыемствы ці выбірайце варыянт all inclusive — усе беларускія падзеі свету (у тым ліку і анлайн-мерапрыемствы). А пасля — сачыце за беларускім дзвіжам і далучайцеся!
Спіс мерапрыемстваў, прысвечаных Дню роднай мовы, будзе пашырацца. Сачыце за навінамі, каб нічога не прапусціць!