У наш час любы актыўны чалавек жыве ў рэжыме мабільнасці і шматзадачнасці. Часам спраў назапашваецца настолькі шмат, што ўсё ў галаве трымаць амаль немагчыма. Гэтую праблему вырашаюць спецыяльныя сэрвісы, дзе вы можаце занатоўваць свае справы, ставіць дэдлайны і адсочваць іх выкананне. Пра такія праграмы мы і пагаворым.
Wunderlist
Адзін з найлепшых сэрвісаў для працы са сваімі задачамі. Адзін з галоўных яго плюсаў – мультыплатформенасць. Wunderlist падтрымлівае нават сістэмы amazon і chromebook. Праграма мае просты і інтуітыўны інтэрфейс: вы проста ствараеце спіс, напаўняеце яго задачамі, выстаўляеце дэдлайны – і гатова! Таксама праграма прадугледжвае сумесную працу з чатам, але ў бясплатнай версіі яго функцыі даволі абмежаваныя, таму не варта вельмі разлічваць на гэтую функцыю. Таксама на мабільных платформах Wunderlist мае свае віджэты, якія дазволяць трымаць справы проста на галоўным экране смартфона і\ці планшэта. Адзінае “але” – дызайн даволі прымітыўны і просты, што не выклікае вялікага захаплення ў аматара крэатыву. А pro-версія з пашыраным функцыяналам будзе вам каштаваць пад 5 даляраў у месяц, што, у прынцыпе, даволі дорага.
Спасылка на старонку запампоўкі: https://www.wunderlist.com/ru/download/
Todoist
Наступны наш тайм-менеджар – Todoist. У адрозненнн ад папярэдняга сэрвісу, ён мае больш прывабны і прыгожы дызайн. Функцыянал вельмі падобны, але ёсць некалькі прыемных дадатковых функцый, як меткі і прыярытэт задачаў. У плане сумеснай працы тут таксама ёсць падтрымка, але, зноў жа, паўнавартасна гэта магчыма толькі пры набыцці тарыфнага плану, які каштуе ад 29 даляраў у год. Todoist падтрымлівае ўсе асноўныя платформы, але без спецыфічных для нас платформ, у чым прайграе Wunderlist.
Спасылка на сайт спампоўкі: https://todoist.com/
Microsoft To-Do
І як абысціся без вялікіх карпарацый! Усім вядомы IT-гігант таксама выпусціў сваю версію тайм-менеджара. Галоўнай праблемай будзе ўваход у сістэму, як гэта звычайна бывае ў прадуктах Microsoft. Здаецца, і неабходны іх акаўнт, а здаецца, і не. Таму чакайце, што праграма будзе доўга вас цягаць па праверках бяспекі і дадаванні інфармацыі. А пасля гэтага мы бачым… абсалютна просты спіс спраў. Просты, але прыгожы дызайн, функцыя дадаць, пазначыць як выкананую і магчымасць паставіць дэдлайн. Больш тут нічога няма. Затое яна абсалютна бясплатная. Падтрымка толькі трох асноўных аперацыйных сістэм: Windows, IOS i Android, таму ўладальнікам іншых платформ гэты варыянт не падыдзе.
Спасылка на праграму: https://todo.microsoft.com/ru-ru
Any.do
Бадай, адзін з найлепшых сэрвісаў для тайм-менеджменту. Прыгожы дызайн, інтуітыўны інтэрфейс – тут ёсць усё! Галоўнае, што вылучае Any.do сярод іншых, – выдатнае размеркаванне вашых спраў. Пры стварэнні задачы праграма адразу прапануе абраць катэгорыю справы – гэта будзе званок ці вам трэба проста нешта забраць? Карацей, амаль ідэальны варыянт, але з адным “але”: поўны функцыянал вам будзе даступны толькі пасля падпіскі, якая каштуе ад 2.29 даляраў на месяц. Але гэта таго каштуе! З падтрымкай тут даволі кансерватыўна: толькі Android, IOS і вэб-версія. Таму аматарам іншых сістэм тут зноў не пашанцавала.
Спасылка на вэб-версію: https://web.any.do/
Спасылка на Android: https://play.google.com/store/apps/details?id=com.anydo
Спасылка на IOS: https://itunes.apple.com/in/app/any.do-to-do-list-planner/id497328576
Evernote
І заканчвае нашу падборку самы папулярны сэрвіс для нататак, тайм-менеджменту і сховішча неабходных вам рэчаў Evernote! У адрозненне ад папярэдніх, спецыялізаваных сэрвісаў, Evernote мае большы функцыянал. Тут апроч нагадванняў вы можаце захоўваць усе патрэбныя вам нататкі, фота, аўдыё і нават рукапісныя нататкі! Таму гэты варыянт падыдзе тым, хто хоча ўсё ў адным. Але папярэджваем: калі вы хочаце мець гэтую праграму адразу на некалькіх прыладах, давядзецца плаціць. Каштаваць ва гэта будзе ад 2.92 даляра на месяц, і тое калі вы адразу аформіце гадавую падпіску. А ў цэлым функцый вам хопіць для паўнавартаснай мабільнасці ў рэжыме non-stop. Калі казаць пра даступнасць праграмы ў платформах, то тут усё сувора – Android і IOS.
Спасылка на Android: https://play.google.com/store/apps/details?id=com.evernote
Спасылка на IOS: https://itunes.apple.com/app/evernote/id281796108?mt=8
Багдан Сакалоў
