Пасля ператрусу ў кнігарні «Кнігаўка» ў дзень адкрыцця крамы, затрымалі выдаўца Андрэя Янушкевіча і супрацоўніцу крамы. Выдаўцу прысудзілі 10 сутак адміністрацыйнага арышту. Пачытайце, як на гэта зрэагаваў музыка Алесь Дзянісаў на сваёй старонцы ў Facebook.
Усё падобна на тое, што вырашылі пасадзіць выдатнага чалавека Андрэя Янушкевіча. Пакуль што за нішто далі 10 сутак, але штосьці вітае ў гэтых цвілых аблоках. Усе ведаюць яго, як кіраўніка выдавецтва «Янушкевіч», але мне ён помніцца найперш па першаму выступу «КальЯн» у РБ. Тады Андруша арганізаваў у 1997 годзе, у абухаўскім Доме культуры канц, на якім гралі, акрамя нас, яшчэ і «Deviation», а таксама менскі гурт «Жах».
Не памятаю, як уся гарадзенская нефармальная брація дабіралася да Абухава. Па-рознаму. У прынцыпе, і недалёка для шалёнага сабакі — 19 км. Гэта было свята! Цэлы Дом культуры з апаратурай, якая была хаця і савецкая, але лепшая за тое, што мелі ў сваіх гаражах ды падвалах. І ўсе, хто мог, туды хацеў патрапіць — патрапіў.
Для мясцовых абухаўскіх «абарыгенаў» гэта таксама быў нейкі «дзвіж», таму ў ДК прыйшоў і стары, і малы. Усім кіраваў жвавы дзядзячка — дырэктар ДК. Прыняў нас вельмі шчыра. Памятаю, што ён быў апазіцыйна-накіраваны ды беларускамоўны, што не дзіўна для тых часоў. Усё праходзіла даволі міла ды пазітыўна. Панкі ды іншыя прадстаўнікі «адшчапенцаў» скакалі пад сцэнай, бабусі усміхаліся, дзеткі разявалі рты, а мясцовыя падлеткі ўжо планавалі «замуціць» пару панк-бандаў у Абухаве. Да таго часу, пакуль «Deviation» не заспявалі сваю легендарную «ХВ»....
Электрычнасць вырубіў мілы дырэктар абухаўскага ДК. «Окончен бал, окончен вечер».
Андруша «Сірыўс» Янушкевіч — легенда гарадзенскага панк-року! (Дарэчы, «Сірыўс» — ягоная мянушка ў неферскім асяроддзі таго часу). Ён здолеў арганізаваць у 1,5-тясячным пасёлку сапраўдны рок-фэст! Пазней ён стварыў адное з самых самабытных ды арыгінальных выдавецтваў! А што стварылі людзі, якія зараз катуюць Андрэя?
