2 красавіка ў свеце адзначаецца Міжнародны дзень дзіцячай кнігі. Віншуем аўтарак і аўтараў, ілюстратарак і ілюстратараў, а нашым чытачам і чытачкам нагадваем пра цікавыя аўдыякнігі па-беларуску, якія можна знайсці на ютуб-канале "Будзьма дзецям". Гэтыя кнігі дапамогуць з карысцю правесці час і дзецям, і бацькам.
Чытанка для маленькіх у дзвюх частках
У «Чытанцы» сабраныя народныя, а таксама аўтарскія вершы і казкі, калыханкі і гульнёвыя прыпеўкі для дзетак да трох гадоў.
Укладальнікі кнігі — вядомыя знаўцы беларускай мовы Вінцук Вячорка і Пётра Садоўскі.
Агучылі Чытанку акторы Ганна Хітрык і Павел Харланчук.
Першая частка чытанкі зроблена ў выглядзе відэакнігі. Яе можна і ГЛЯДЗЕЦЬ, і СЛУХАЦЬ, і ЧЫТАЦЬ адначасова.
«Суперкніга пра Біла і Болу: Біл — разумны, Бола — вясёлая»
Кніга распавядае пра сям'ю, у якой нарадзілася асаблівая дзяўчынка. Кніга будзе карыснай не толькі сем'ям з асаблівымі дзецьмі, але абсалютна ўсім без выключэння дзецям і дарослым. Бо гэта гісторыя пра тое, наколькі мы гатовыя жыць побач з тымі, хто не падобны да нас. Але найперш гэтая кніга пра любоў і здольнасць прымаць.
Актыўны ўдзел у стварэнні кнігі на беларускай мове і запісе аўдыя-версіі прынялі Надзя Кандрусевіч, Аня Хітрык, Павал Харланчук, Андрэй Хадановіч і Алеся Башарымава.
Казкі пра Пэтсана і Фіндуса
Вельмі душэўныя гісторыі пра старэнькага фермера Пэтсана,які жыве разам са сваімі курамі ў невялікім дамку на хутары. Але ён вельмі адзінокі. Аднойчы да яго прыходзіць суседка Бэда Андэрсан з маленькай скрыняй. «Фіндус. Зялёны Гарошак» — напісана на ёй вялікімі літарамі. Аднак там зусім не гарошак. А маленькі коцік! Тады і пачынаюцца прыгоды Пэтсана і Фіндуса. Вас чакае 9 захапляльных гісторый фермера і яго коціка.
Размалёўка для дзяцей і дарослых па матывах анімацыйнага фільма "Будзьма беларусамі!" пра гісторыю Беларусі за 5 хвілін. Францыск Скарына, Янка Купала, Максім Багдановіч ды іншыя персанажы і падзеі нашай гісторыі. Таксама раім маляванку і дарослым у тэрапеўтычных мэтах.
