У апошнія гады беларусы актыўна шукаюць магчымасці рэалізоўваць свой творчы патэнцыял у блізкім ці далёкім замежжы. Вядома, большасць музыкантаў, тэатралаў, літаратараў, спецыялістаў па арганізацыі вольнага часу, спартсменаў імкнуцца ў Еўропу, але існуе і пэўная частка такога плана спецыялістаў, якія шукаюць шчасця ў супрацьлеглым баку, у Азіі. Напрыклад, у Кітаі.
Гітарыст і бас-гітарыст Віктар Зайцаў доўгі час жыў і працаваў у паўднёва-ўсходняй частцы Кітая. Упершыню наш суразмоўнік патрапіў на кітайскае ўзбярэжжа Ціхага акіяна ў 2018 годзе. Віктар граў з рознымі інтэрнацыянальнымі калектывамі, дзе ўдзельнічалі ў асноўным беларусы і ўкраінцы, у некаторых выпадках рускія. Канцэртнае агенцтва, з якім ён працаваў, адмыслова падбірала ўдзельнікаў утвораных калектываў па крытэрыях этнічнай блізкасці і па моўным прынцыпе. Пазней Віктар непасрэдна меў дачыненне да арганізацыі выключна беларускага гурта пад назвай V-King, дзе ўдзельнічалі музыканты з Магілёва і Мінска. Паразмаўлялі з Віктарам пра ягоны досвед выступленняў у Кітаі.
Віктар, дзе непасрэдна вы базіраваліся, дзе знаходзілася ваша штаб-кватэра? І ці толькі ў адным месцы адбывалася ваша творчая дзейнасць?
— Гэта быў горад Ханчжоў — можна сказаць, культурная сталіца паўднёвага Кітая. У самім горадзе мы штомесяц удзельнічалі ў дзясятках мерапрыемстваў рознага ўзроўню — ад выступаў у клубах і на карпаратывах да вялікіх канцэртаў у залах на некалькі дзясяткаў тысяч гледачоў.
Пачатак выступлення на канцэртна-забаўляльнай арэне ў Нанкіне
Выязджалі на працу і ў іншыя месцы. Напрыклад, у Шаасін, у Вэньчжоў, што завецца «кітайскім Іерусалімам», альбо Цзянсу, які яшчэ называюць «кітайскай Венецыяй», і дзе мы гралі на сцэне, канструкцыі якой амывалі самыя сапраўдныя акіянскія хвалі. Тое былі своеасаблівыя камандзіроўкі: і ў Шаасіне, і ў Вэньчжоў, і ў Цзянсу мы працавалі па месяцы. Ужывую гралі на розных элітных мерапрыемствах такіх кампаній, як Porsche, Bentley, Mercedes-Benz. Таксама выязджалі на канцэрты ў Шанхай, Нанкін — старажытную сталіцу Кітая, Суджоў, Фуджоў, Тайджоў, ды ў шматлікія іншыя, меншыя гарады, назвы якіх ужо проста пераблыталіся.
Віктар Зайцаў падчас канцэрта ў межах бізнес-канферэнцыі найбуйнейшай кампаніі Кітая Alibaba (сярод іншага — уладальніка кампаній Aliexpress i Taobao). На сцэне інтэрнацыянальны склад артыстаў разам з дуэтам спявачак-блізнятаў з Украіны «Аня і Оля».
У плане прафесійнай арганізацыі якія ўражанні засталіся ад супрацы з кітайскім шоу-бізнесам?
— Уся наша праца заўсёды была ў радасць. Арганізатары па максімуме стараліся якасна падысці да справы і ў плане транспарту, і ў плане сцэнічнага абсталявання і тэхнічнага райдару. Да таго ж, да ўмоваў нашага пражывання ставіліся дастаткова ўважліва — на нас ніхто не спрабаваў сэканоміць сродкі — і гатэлі, і харчаванне былі на ўзроўні, з улікам ўсіх пажаданняў. Ганарары ніколі не затрымлівалі, пазначаныя ў дамове грошы выплочваліся своечасова і цалкам. Па памерах заробкаў у Еўропе мы можам толькі марыць пра такія ганарары.
Мантаж сцэны для канцэрта на адной з плошчаў Ханчжоў
А ці давялося сустрэць кагосьці з землякоў-музыкантаў, з якімі быў знаёмы раней?
— У гурце V-King мы гралі разам з Эдуардам Кажэкам, клавішнікам і маім аднакурснікам па музычнай вучэльні ў Магілёве. А яшчэ пэўны перыяд у непасрэднай блізкасці ад мяне — на адлегласці аднаго прыпынку на электрычцы, у горадзе Фуянь, — знаходзіўся Яўген Звераў, выдатны магілёўскі барабаншчык, з якім мы супрацоўнічалі ў розных праектах у Беларусі.
Яўген Звераў прысутнічае на мантажы акрабатычнага абсталявання ўласнай канструкцыі
Аднак Жэня быў у Кітаі не па сваёй музычнай спецыяльнасці, а па роднаснай у сферы забаўляльнай дзейнасці — акрабатычна-цыркавой. Справа ў тым, што мой зямляк з’яўляецца яшчэ і майстрам спорту па скоках на батуце. Ён разам з калегам распрацаваў і падрыхтаваў акрабатычны снарад, які зацікавіў кітайскае аддзяленне сусветна вядомага Цырка Дзю Салей. Яўген ездзіў прадстаўляць сваю распрацоўку.
Пасля вяртання з экзатычных паўднёвых краёў ці ўдаецца паўтарыць паспяховы ўдзел у шоу-бізнесе іншых краін?
— Цягам 2022 года быў досвед пошукаў музычнай працы ў Літве і ў Польшчы. Гэта быў удзел у некалькіх праектах, якія яшчэ на стадыі станаўлення, таму рана штосьці гаварыць. Зразумела, цяперашні досвед працы проста непараўнальны з той усходняй казкай, дзе мне давялося пабываць.
Ю. Н., budzma.org
