Малады беларускі музыка Aureli распавёў пра нядаўнія рэлізы, творчыя мэты і падзяліўся сваім «топам» трэкаў айчынных выканаўцаў, які атрымаўся своеасаблівым спалучэннем лікбезу ў гісторыю беларускай музыкі, асобаў, якія яе стваралі, і ўласных перажыванняў ад пачутага.
Фота: Instagram Aureli
Як пачаў займацца музыкай?
Цягам гадоў я слухаў вельмі шмат цікавай музыкі розных жанраў, часоў і краін. Мне хочацца сабраць увесь гэты досвед і з дапамогай яго ўзбагачаць нашую беларускую сцэну, эксперыментаваць з гучаннем і заўсёды спрабаваць нешта новае, апавядаючы ў песнях пра сваё жыццё, бо ўласныя перажыванні — гэта, на маю думку, невычарпальны рэсурс.
Чаму пачаў ствараць песні менавіта па-беларуску?
Наконт беларускай мовы — для мяне нават ніколі не стаяла пытанне, чаму менавіта па-беларуску. Гэта было відавочна, таму што ўсё жыццё я адчуваў сябе беларусам і хацеў рабіць штосьці сваё на роднай сэрцу мове.
Распавядзі падрабязней пра свой новы рэліз «Берагі».
Мой новы сінгл «Берагі» — гэта таксама эксперымент, натхнёны гучаннем выканаўцы Joji і лоўфай хіп-хопам. Я падумаў, што не ведаю ніводнага прыкладу такой музыкі ў Беларусі, таму хто як не я будзе першым? Я ўзгадаў сваю старую песню «Атракцыён», якую я напісаў яшчэ ў далёкім 2018 годзе, і цалкам перарабіў яе аранжыроўку на новы лад. Потым я злавіў раптоўнае натхненне і за пару тыдняў цалкам напісаў і музыку, і тэкст для песні «Берагі».
Што да творчых планаў на бліжэйшы час?
Хоць новыя песні выйшлі зусім нядаўна, я ўжо сканчваю працу над новымі, а таксама ўжо пачаў працаваць над яшчэ больш новымі. Пакуль у гэтым жыцці я не знайшоў таго, што прыносіла б мне такое задавальненне, як напісанне музыкі. Я займаўся б ёй нават калі б мяне слухаў адзін чалавек, і гэтым чалавекам быў я (смяецца). Проста таму што толькі ў музыку я магу акунуцца з галавой і цалкам забыцца пра існаванне навакольнага свету.
Топ-11 беларускіх трэкаў ад Aureli:
1) Крама — Будзь разам з намі
Пачуў я гэтую песню даўно, дзесьці ў 2014 годзе. Вельмі зачапіла дужа прыгожае сола і вайб надзеі, калі незразумела, што будзе далей, але хочацца верыць у лепшае. Гэта класіка, якая, як кажуць, never gets old — хоць я не асабліва часта пераслухоўваю гэтую песню зараз, але калі чую яе дзесьці, на твары адразу з’яўляецца лёгкая ўсмешка ад прыемных успамінаў.
2) Я нарадзіўся тут — Нёман
Напэўна, гэтую песню ўпершыню я пачуў у далёкім дзяцінстве, але на рэпіце пачаў слухаць толькі летам 2022 года. Я ведаю, што гэта даўняя песня яшчэ з савецкіх часоў, але менавіта інтэрпрэтацыя Вайцюшкевіча і эпічная мелодыя з фолкавым вайбам выклікаюць дрыжыкі пры кожным праслухоўванні.
3) Петля Пристрастия — Груз
Гэта адна з самых магутных песень не толькі ў беларускай, але ўвогуле ва ўсёй музыцы, што я чуў. Ад яе хочацца хэдбэнгіць, пакуль не зламаеш шыю, і ламаць усё навокал.
4) Крамбамбуля — Люблю
Я вельмі люблю «Крамбамбулю», а апроч яе яшчэ люблю ваду, і неба, і зямлю... Можна сказаць, я вырас на музыцы «Крамбамбулі». А «Люблю» — гэта якраз тая песня, якая ідэальна адлюстроўвае ўвесь вайб гэтага праекта — яна пазітыўная і смешная, і ад яе на душы проста робіцца лёгка і бесклапотна.
5) ЛСП — Канат
Разбавім гэты пераважна рокавы спіс ужо класікай нашай поп/хіп-хоп сцэны — ЛСП. Іх песні нараджаюць у галаве вобразы дэпрэсіўнай, але адначасова вясёлай і шалёнай маладосці ў сучасным Мінску. Менавіта гэтую песню я выбраў, таму што гэта была адна з першых песень ЛСП, якую я пачуў. Люблю іх за спалучэнне светлага вайбу, які дасягаецца за кошт радаснага голасу Алега і энергічных электронных бітоў, і часам вельмі змрочных тэкстаў — гэты кантраст і робіць ЛСП непаўторным.
6) Shuma — Pesenka
Працягваем разбаўляць рок электроншчынай — вельмі цаню праект Shuma за сучаснае і арыгінальнае гучанне. Не хочацца казаць банальшчыну пра тое, што яны дораць новае жыццё традыцыйным беларускім спевам (хоць гэта, безумоўна, факт). Мяне Shuma ў першую чаргу ўражвае сваёй высокай якасцю гучання і выканання.
7) Adel Line — Сэрца
Вельмі люблю песню Адэлі «Сэрца» — гэта надзвычай шчыры твор пра цяжкі перыяд у жыцці, праз які яна праходзіла ў той час. Пачуў яе я ў 2017 годзе, якраз калі выйшаў увесь альбом «Казка», і з усіх песень гэтая вылучалася — яна была самай змрочнай сярод іншых, даволі пазітыўных і аптымістычных песень. Мы з Адэляй сябруем з далёкага дзяцінства, і ўсё сваё жыццё яна пастаянна займалася музыкай і спявала, і я быў дужа ўражаны, калі яна пачала пісаць уласныя творы. І вельмі цешыць, што яна працягвае рабіць гэта і цяпер.
8) Mauzer — Таварыш Маўзэр
Я ўпершыню пачуў гэты гурт у 2020 годзе ўвесну, калі пісаў сваю дыпломную працу пра гісторыю беларускага року. Да гэтага я не ведаў, што існуе беларускамоўны ню-метал, прычым настолькі круты, жорсткі і шчыры. Дарэчы, у гурце граў Рома Англічанін, насамрэч вельмі недаацэненая фігура беларускай музыкі — сапраўдная рок-зорка, якая жыла па правіле «Live fast, die young».
9) J:Mors — Маё сонца
Варта дадаць у спіс трохі класікі. Упершыню я пачуў яе дзесьці ў 2015-м. Яна мае вельмі яскравы восеньскі вайб і, хоць я не вялікі фанат гурта J:Морс, менавіта гэтая песня супакойвае і пераносіць думкамі ў родны восеньскі Мінск.
10) Syndrom Samazvanca — Bu Samoje
Гэта малады гурт, які я пачуў упершыню літаральна ў студзені 2023-га, але ён настолькі мяне ўразіў, што я не магу не дадаць яго ў топ. Гэта крутая прог/стоунер/псіхадэлічная праца, якая гучыць як нейкая неверагодная калабарацыя Ulis, King Crimson і Mastodon. Я ў захапленні ад цікавых кампазіцыйных рашэнняў, дзіўных памераў і ўвогуле дужа актуальнага і сучаснага гучання гурта.
11) Лявон Вольскі — Маё каханне
Завяршыць свой топ хацелася б адной з тых песень, якія падтрымліваюць у змрочныя часы, да якіх хочацца вяртацца. «Маё каханне» натхніла мяне на шматлікія ўласныя творы, гэта была адна з першых песень, што я вывучыў на гітары і якую вучыўся спяваць. «Маё каханне» — гэта кожнае беларускае лета, незлічоныя сонечныя дні і цёплыя ночы, аб якіх мы марым, каб яны ніколі не сканчваліся.
