Прэмія дакументальных і арт-праектаў для беларускіх фатографаў прысуджаецца ў дзвюх намінацыях: дакументальная фатаграфія і арт-фатаграфія. Праекты прымаюцца да 20 кастрычніка. Вынікі будуць абвешчаныя на пачатку лістапада.
Працы з шорт-ліста конкурсу ўвойдуць у штогадовы каталог прэміі ды выставу (адбудзецца ў лютым 2016 года ў мінскай прасторы ЦЭХ). Таксама адзін з праектаў у кожнай намінацыі атрымае Гран-пры. Пераможцам арганізуюць персанальныя выставы ў межах Месяца фатаграфіі ў Мінску ў 2016 годзе. Таксама найлепшыя аўтары будуць мець магчымасць наведаць адну з міжнародных фатаграфічных падзеяў: фестываль, майстар-клас ці партфоліа-рэвю (фармат прызу вызначыць аргкамітэт па выніках конкурсу).
Сёлета ў журы ПРАФОТА ўваходзяць: культуролаг і магістр у галіне сацыялогіі ды сацыяльнай антрапалогіі Святлана Паляшчук, фатограф Кен Шлес (Ken Schles), фотарэдактар Джэймз Ўэлфард (James Wellford), фатограф Сайман Норфалк (Simon Norfolk), фатограф Джордж Джорджыў (George Georgion), фотарэдактарка Барбара Штаўс (Barbara Stauss). Узначальвае журы прадзюсарка, куратарка, фотарэдактарка Ганна Шпакава.
Прэмія ПРАФОТА ўручаецца ў межах Месяца фатаграфіі ў Мінску другі год запар. Летась найлепшым у намінацыі «арт-фатаграфія» стаў праект Аляксандра Міхалковіча «Прымусіць інтэрнэт памятаць Галакост». У «дакументальнай фатаграфіі» перамагла Святлана Ярковіч з праектам «Паміж лесам і ракой».
Больш інфармацыі пра прэмію, а таксама ўмовы ўдзелу можна пачытаць тут
Кантактная інфармацыя:
Юлія Дарашкевіч, арганізатарка прэміі ПРАФОТА
+375296868333
https://prafota.by
МІСІЯ ПРАФОТА
Мы выступаем за стварэнне адзінай конкурснай прасторы для камунікацыі і падвышэння візуальнай пісьменнасці людзей, якія займаюцца і цікавяцца фатаграфіяй. Нашая мэта — развіццё беларускай фатаграфіі шляхам падвышэння стандартаў сучаснай дакументальнай і арт-фатаграфіі ў Беларусі. Праз стымуляванне грамадскага інтарэсу да фатаграфіі мы імкнёмся стварыць спрыяльныя ўмовы для свабоднага абмену інфармацыяй і росту магчымасцяў для актыўнага і эфектыўнага ўзаемадзеяння беларускіх фатографаў, крытыкаў і аматараў фатаграфіі.
