Шэраг культурніцкіх сустрэч правяла вядомая паэтка і аўтарка дзіцячых песняў Ала Кажэра па Мінскіх школах на працягу жніўня.

А. Кажэра: “З задавальненнем у гэтым жніўні я правяла сустрэчы з дзецьмі і іх настаўнікамі.

44 СШ вельмі добра падрыхтавалася да сустрэчы. Дзеці чыталі загадкі, вершы і атрымлівалі ўзнагароды.

У Савецкім раёне – наадварот, не вельмі добра паставіліся. Настаўнікі кінулі мяне сам насам з дзецьмі, засталася толькі адна настаўніца. Вершаў ніхто не ведаў. Але ў дзетак, калі яны слухалі, вочкі загараліся. Імкнуліся даведацца новага, беларускага. Таксама прысутнічалі в’етнамскія дзеці, якія пачалі частаваць мяне цукеркамі, што вельмі здзівіла. Было нечакана і прыемна.

А вось 23 гімназія, усё таго ж раёну, шыкоўна падышла да арганізацыі сустрэчы. І прымалі добра, і настаўнікі, і дзеткі на пытанне: “Хто лічыць сабе беларусам?” – адразу падымалі рукі. Ведалі шмат вершаў, добра размаўлялі на беларускай мове. А дырэктарка нават запрасіла выступіць на Дзень настаўніка. Вось такое добразычлівае стаўленне бывае.

Школы 159 і 191 сур’ёзна падышлі да мерапрыемства. Падрыхтавалі актавыя залі. Выхавальнікі на пытанне пра беларускасць першыя падымалі рукі. Плён ад такой працы, такіх культурніцкіх сустрэч ёсць, няхай і не кожны настаўнік пакуль разумее важнасць беларускасці, але ўсё больш і больш людзей ідзе на кантакт, выхоўваючы вартае пакаленне.

Асабліва дзеткам спадабалася, як рабіць радавод. Вочкі проста загараліся.

У розных школах, як заўважылі, ставяцца па-рознаму. Нашым школам патрэбныя будзіцелі беларушчыны, таму што дзеці рвуцца быць беларусамі, рвуцца да ведаў. І гэта вельмі прыемна”.

Тэгі: Мінск