Польскі Newsweek назваў беларускага журналіста Анджэя Пачобута «Фігурай дзесяцігоддзя», піша «Салідарнасць».
Анджэй Пачобут
«Выдатны журналіст, калега, чалавек, які мацнейшы за сталь. Анджэй не змог забраць узнагароду, таму што сядзіць у турме ўжо 1075 дзён. Ён выжыве. Вось пабачыце! Ён яшчэ напіша тэкст пра падзенне Лукашэнкі», — адзначыў журналіст выдання Яцэк Паўліцкі.
Анджэя Пачобута затрымалі 25 сакавіка 2021 года ў Гродне. За артыкул аб нападзе СССР на Польшчу ў верасні 1939-га яго абвінавацілі ў «распальванні варожасці па нацыянальнай прыкмеце».
У абвінавачанні супраць журналіста гаворыцца, што Пачобут у СМІ назваў агрэсіяй нападзенне СССР на Польшчу ў 1939 годзе. Акрамя таго, яму паставілі ў віну заявы ў абарону польскай меншасці ў Беларусі, артыкулы ў Gazeta Wyborcza пра беларускія пратэсты ў 2020-м і тэкст у Magazyn Polski, напісаны ў 2006 годзе і прысвечаны Анатолю Радзівоніку, аднаму з камандзіраў Польскага антыкамуністычнага падполля ў Гродзенскай вобласці.
Анджэя Пачобута прыгаварылі да васьмі гадоў калоніі ва ўмовах узмоцненага рэжыму. Журналіст адмовіўся пісаць прашэнне аб памілаванні на імя Лукашэнкі.
З пачатку адбывання тэрміну ў Анджэя Пачобута не было ні спатканняў, ні перадач. Апошнія паўгода ён правёў у памяшканнях камернага тыпу. Так палітзняволенага пакаралі за адмову ад працы, якую нельга выканаць. У Анджэя сур’ёзныя праблемы са здароўем, пры гэтым палітвязня змясцілі ў карцар.
