Працягваем знаёмcтва з вартымі беларускамоўнымі праектамі. У сённяшнім выпуску арт-праект Zabor – спроба вярнуць гораду тое, чаго ў ім бракуе, – мастацтва і беларускую мову.

У ліпені 2012 года стартаваў арт-праект Zabor, мэта якога — размясціць рэпрадукцыі сучасных беларускіх мастакоў на платах гарадоў. У праекце ўзялі ўдзел 4 мінскія мастакі, якія працуюць у розных кірунках, ад наіўнага мастацтва да канцэптуалізму. У рэгіёнах да выставы далучаецца яшчэ па адным творцы — пераможцы адмысловага адборачнага конкурсу “На Zabore”.

Амаль уся прома-прадукцыя праекта – афішы, буклеты, запрашэнні, як і ўласна выстава (подпісы да рэпрадукцый) – выкананыя на беларускай мове. Амаль, бо прэс-рэлізы ўсё ж даводзіцца пісаць на дзвюх мовах – многія СМІ публікуюць матэрыялы выключна па-руску.

Чаму на беларускай мове? Усё відавочна – кажуць арганізатары, ды і пытання, на якой мове будаваць камунікацыю нават не ўзнікала. Па-першае, у праекце ўдзельнічаюць толькі беларускія мастакі, таму хацелася падкрэсліць менавіта беларускі складнік выставаў. Па-другое, сама тэма праекта – Беларусь, гэта выставы пра беларусаў і для беларусаў, а на выстаўленых рэпрадукцыях выяўлены вядомыя помнікі нашай архітэктуры, знакавыя падзеі, характэрныя для Беларусі персанажы. Да таго ж беларуская мова вельмі арганічна ўпісваецца ў гарадскую прастору, нават пры тым што большасць суайчыннікаў размаўляе па-руску.

Пасля запуску праекту, арганізатарам пачалі пісаць і званіць – выказвалі падзяку за тое, што Zabor беларускамоўны. З нараканняў хіба што той момант, што ў Беларусі часта бываюць замежныя турысты (у асноўным з Расіі, Украіны), якія не разумеюць па-беларуску. Відавочна, што такая заўвага неістотная, бо, напрыклад, цяжка ўявіць, каб тыя ж турысты прыехалі ў Францыю, пабачылі праект на французскай мове і пачалі званіць-абурацца, што не разумеюць.

Беларуская мова, як і мастацтва, існуе сама па сабе, яна не надта ўцягнута ў наша штодзённае жыццё і пераважна ў яе падобная пазіцыя: калі прастора для мастацтва – гэта галерэі, музеі, то ў мовы – школа, падручнікі, зрэдку – тэлебачанне. Таму арт-праект Zabor –спроба экспансіі адначасова як мастацтва, так і беларускай мовы ў гарадскую прастору. Тым больш, што раней мастацтва было неад’емнай часткай жыцця горада, якую Zabor і вяртае. Тое ж з мовай – праект пераносіць яе ў арганічную гарадскую прастору, дзе мінакі, праходзячы кожны дзень каля таго самага плоту, бачаць беларускія словы.

Выйграе ад камунікацыі на беларускай мове і непасрэдна сама кампанія-арганізатар выставы “Зубр Капітал”. Гэта беларуская інвестыцыйная кампанія, якая існуе і працуе тут, кампанія, створаная ў Беларусі, і камунікацыя на роднай мове дапамагае патэнцыйным кліентам зарыентавацца, бо ў грамадстве існуе ўстойлівае меркаванне, што ўсе інвестыцыйныя кампаніі працуюць з замежжа.

Паводле гутаркі з Антанінай Сераковай, брэнд-мэнэджарам кампаніі “Зубр Капітал”

Выстава арыгіналаў работ мастакоў у Нацыянальным мастацкім музеі зробіцца кульмінацыяй праекту Zabor і збярэ па 8 работ ад кожнага з 9 мастакоў-удзельнікаў. Некаторыя карціны будуць прадстаўленыя ўпершыню! Інвестыцыйная кампанія “Зубр Капітал” плануе адкрыць выставу ў сакавіку 2014 года, а ўсіх ахвочых запрашае паўдзельнічаць у творчым конкурсе – прыдумаць канцэпцыю прасоўвання выставы.