На Малым гарадзішчы — на рацэ Менка — навукоўцы Інстытута гісторыі НАН Беларусі зрабілі значнае адкрыццё. У слоі пажару, які датуецца XI стагоддзем, знойдзены рэдкія для рэгіёну прадметы побыту, піша «Прысталічча».
Фота: Інстытут гісторыі НАН Беларусі
Работы на ўрочышчы Малое гарадзішча (вёска Гарадзішча) стартавалі на мінулым тыдні.
Зараз раскопкі тут праходзяць пры ўдзеле студэнтаў Беларускага дзяржаўнага ўніверсітэта культуры і мастацтваў. Кіруе экспедыцыяй загадчык аддзела археалогіі Сярэдніх вякоў і Новага часу Інстытута гісторыі НАН Беларусі Андрэй Вайцяховіч.
Што знайшлі?
У пласце моцнага пажару XI стагоддзя археолагі знайшлі:
- фрагменты абвугленай драўлянай талеркі;
- кавалачкі берасцянога посуду.
Апошняя знаходка — сапраўдная рэдкасць для нашых шырот. Бяроста рэдка захоўваецца ў культурным пласце, але пажар, які знішчыў пабудову, закансерваваў арганік у выглядзе абвугленых рэшткаў.
Фота: Інстытут гісторыі
«Хлопцам трэба будзе даследаваць гэты ўчастак літаральна па сантыметры. Кожны пласт зямлі — як старонка летапісу», — пракаментаваў ход работ Андрэй Вайцяховіч.
Цяперашні сезон на Малым гарадзішчы працягнецца два тыдні. Яго асаблівасць —прыцягненне да раскопак студэнтаў профільнай ВНУ. Маладыя даследчыкі на месцы знаёмяцца з методыкай палявой археалогіі і дапамагаюць апрацоўваць знаходкі.
Фота: Інстытут гісторыі
Археалагічны комплекс на рацэ Менка — адзін з самых вядомых у Мінскім раёне. Раскопкі тут вядуцца не першы год, і кожная экспедыцыя дадае новыя звесткі да гісторыі краю.
