Музыка Мікіта Найдзёнаў запускае ў Варшаве музычнае шоў «СамШазам», якое шмат гадоў было папулярнае ў Мінску. Як і ў Беларусі, госці будуць адгадваць мелодыі ў выкананні бэнда. Праект «пераязджае» на два гады пазней за свайго стваральніка — яго эвакуіравалі з Беларусі пасля арышту за пратэсты. Аб адроджаным шоу Мікіта Найдзёнаў распавёў MOST.
«СамШазам» у Мінску. Фота прадастаўлены Мікітам Найдзёнавым
«СамШазам» з’явіўся ў Мінску ў 2018 годзе. Час для старту быў ўдалы: тады не было «ні гастролек, ні ўзгадненняў»
— Мы былі цалкам вольныя ў выбары музычных трэкаў і выканаўцаў. Можна было рабіць усё што хочаш, — распавядае Найдзёнаў.
Музычны праект спадабаўся публіцы і хутка набіраў абароты. З’явіліся музыканты, вакалісты, а сам Мікіта стаў тварам шоу. «СамШазам» аброс пастаяннай аўдыторыяй, якая рэгулярна прыходзіла на вечарынкі.
— Да гэтага нічога падобнага ў Мінску не было. Музычны вечар, дзе адгадваюць песні ў выкананні жывога бэнда. Мы па два-тры разы на месяц рабілі двухгадзінную праграму, якая часта складалася з сямі тэматычных раундаў. Яны маглі быць прысвечаны вусатым спевакам, датам з «Вікіпедыі» або настальгічным саўндтрэкам «Дыснэя». Гэта сумесь гумару, актуальнага парадку дня і музыкі, — апісвае канцэпцыю Найдзёнаў.
Ад папулярных музычных квізаў «СамШазам» адрозніваў фармат з «уласнай драматургіяй» і жывая музыка.
«СамШазам» у Мінску. Фота прадастаўлены Мікітам Найдзёнавым
«Сабралі штучкі і кантрабандна пераехалі ў багажніку»
У сакавіку 2023 года Мікіту затрымалі за ўдзел у пратэстах.
— Памятаю, як, седзячы ў кайданках, перадаваў камандзе, хто будзе весці шоў замест мяне, — апісвае той дзень музыка.
Яму далі «хатнюю хімію», але фонду BYSOL удалося арганізаваць эвакуацыю Найдзёнава з Беларусі. Ён пераехаў у Варшаву.
Усе два гады, што стваральнік знаходзіўся на эміграцыі, шоу ў Мінску працягвалася. А Мікіта праглядаў варшаўскія лакацыі ў пошуках месца «з добрай сцэнай і класным гукам» і вывучаў рынак забаў. Гаворыць, канкурэнтаў не знайшоў.
— Дакладна ведаю, што нешта падобнае ёсць на польскім тэлебачанні. Але каб гэта было менавіта вячэрняе шоў з бэндам — такога я не бачыў.
«СамШазам» у Мінску. Фота прадастаўлены Мікітам Найдзёнавым
У нейкі момант музыка зразумеў, што надышоў час перавозіць праект у Польшчу.
Мікіта мяркуе, што з падобнай сітуацыяй сутыкнуліся многія беларускія бізнэсы: працягваць іх унутры краіны стала немэтазгодна.
— Мы сабралі свае штучкі ў Мінску і кантрабандна пераехалі ў багажніку машыны. Цяпер ужо мінская публіка павінна рабіць візы, каб да нас прыехаць.
«Эміграцыя, лёгкая настальгія і адзінота ў вялікім горадзе»
Найдзёнаў спыніў выбар на варшаўскай пляцоўцы Canoe Lounge, дзе ёсць магчымасць арганізаваць выступы з жывым гукам.
У камандзе «СамШазама» восем беларусаў, у тым ліку Мікіта — некаторыя музыкі з’ехалі з краіны ўслед за шоў, іншыя далучыліся да праекту ўжо ў Польшчы.
«СамШазам» у Мінску. Фота прадастаўлены Мікітам Найдзёнавым
Рэпертуар змяніўся ўслед за абставінамі. Доўгі час шоу было «яркім кактэйлем» музыкі: трэкі Цімы Беларускіх і Aerosmith, беларускай спявачкі Palina і Алега Газманава. Пасля пачатку поўнамаштабнай вайны ва Украіне арганізатары ўнеслі некаторых музыкаў у «чорны спіс».
— Мы, як актуальнае шоу, заўсёды глядзім на настрой у грамадстве і на тое, пра што перажывае наша публіка. Цяпер для нас актуальныя — эміграцыя, лёгкая настальгія, адзінота ў вялікім горадзе і нешта вечнае і нятленнае... [У праграме] будуць тыя, каго мы слухаем і любім, а таксама тыя, каго мы адносім да катэгорыі «зашквараў» — самых папсовых рэдфлагаў.
«Ведаю некалькі парачак, якія пазнаёміліся на шоў і пажаніліся»
На першых шоў у Варшаве — ужо ў канцы лістапада — каманда чакае пераважна беларускую публіку, у прыватнасці тых, хто запомніў «СамШазам» яшчэ ў Мінску. Білеты купляюць не толькі беларусы Варшавы — на шоу збіраюцца прыехаць з Гданьска, Вроцлава і Вільнюса.
— Людзі хадзілі да нас цэлымі камандамі гадамі. Ведаю нават некалькі парачак, якія пазнаёміліся на «СамШазам», а потым пажаніліся. Я спадзяюся, што нашае шоў стане яшчэ адной апорай для беларусаў на эміграцыі, — кажа стваральнік.
Мікіта не выключае, што пасля на шоу будуць хадзіць украінцы і палякі.
— Пакуль мы абапіраемся на публіку, якая нас ведае. Але «СамШазам» — гэта гібрыдны фрукт, які хутка адаптуецца да новай глебы. Магчыма, у хуткім часе будзе англамоўны «СамШазам», а потым і польскі — у нас ёсць агульны бэкграўнд, — адзначае музыка.
