Грамадская кампанія «Будзьма Беларусамі!», Міжнародны саюз беларускіх пісьменнікаў і Фонд Kamunikat.org выдалі «Беларускі каляндар-2023» з малюнкамі і словамі на кожны дзень. Цяпер беларусы замежжа, нават знаходзячыся за тысячы кіламетраў ад радзімы, могуць лёгка замовіць сабе беларускі каляндар. І мы налічылі ажно 5 прычын, чаму варта гэта зрабіць.
1. Дапамагае вучыць беларускую мову
Каляндар — сапраўдная скарбонка сакавітых, адметных беларускіх слоўцаў, дбайна падабраных руплівымі выдаўцамі. Тэмы самыя розныя: тут і назвы раслінаў і жывёл, назвы інструментаў, прадметаў вопраткі, мэблі, прыродных з’яваў... Нават добрыя знаўцы беларускай мовы знойдуць нешта цікавае для сябе.
2. Дорыць добры настрой
Калі падаецца, што ўсё ў жыцці змрочна і настрою зусім няма, пагартайце хвілінку «Беларускі каляндар». Яскравыя і пазітыўныя малюнкі дапамогуць падняць настрой.
3. Дапамагае планаваць свой час
Гэта функцыя любога календара. Уласна кажучы, для таго яны і створаны. Але ж куды прыямней планаваць, карыстаючыся прыгожым календаром на роднай мове.
4. Прыемны ранішні рытуал.
Новы дзень — новае слова і новы малюнак. Чаму б не пачынаць сваю раніцу з таго, каб глянуць на беларускі каляндар і даведацца, якое слова выдаўцы абралі для гэтага дня? Паспрабуйце! Упэўнены, многім такі рытуал прыйдзеца даспадобы.
5. Шыкоўны падарунак на Новы год і Каляды.
Зімовыя святы ўжо хутка. Самы час падумаць пра падарункі. Калі вы яшчэ не вызначыліся, каму што падарыць, то вось вам падказачка: «Беларускі каляндар» — самы што ні на ёсць універсальны падарунак, які падыдзе для сяброў, для калег, бацькоў, школьнікаў... І нават зусім маленькім дзецям спадабаецца разглядваць каляровыя малюнкі.
А галоўнае — гэта падарунак з беларускім характарам!
Замовіць каляндар з магчымасцю дасылкі ў розныя краіны свету можна на сайце беларускай інтэрнэт-бібліятэкі Камунікат па спасылцы: альбо праз e-mail [email protected].
