Старшыня Камітэта Сейма па культуры Вітаўтас Юозапайціс прапануе заканадаўча забараніць у Літве ўсе расійскія і беларускія дзяржаўныя СМІ, паколькі надзвычайнае становішча не будзе ўжо дзейнічаць на ўсёй тэрыторыі краіны, піша lrt.lt.

Крыніца: www.iphones.ru

Юозапайціс паведаміў у аўторак, што зарэгістраваў папраўкі да Закона аб грамадскай інфармацыі

Такая забарона дзейнічала пасля ўварвання Расіі ва Украіну і ўвядзення надзвычайнага становішча на ўсёй тэрыторыі Літвы. Аднак з 16 верасня абмежаванні будуць прымяняцца толькі на мяжы, таму, на думку Мінкультуры, гэта адкрые дарогу некаторым каналам з забаўляльным кантэнтам, якія наўпрост не распаўсюджваюць крамлёўскую і мінскую дэзінфармацыю або ваенную прапаганду.

Кансерватар сцвярджае, што ўнёс гэтыя змены пасля кансультацый са спецыялістамі Міністэрства культуры.

Паводле яго слоў, у адказ на дзеянні Расіі Еўрасаюз ужо прыняў розныя абмежавальныя меры, у тым ліку абмежаванне кантэнту падкантрольных Расіі СМІ.

«Для Літвы, якая мае знешнюю граніцу як з Расіяй, так і з Беларуссю, вельмі важна эфектыўна абараняць грамадства і інфармацыйную прастору ад інфармацыйных пагроз», — адзначыў Юозапайціс у прэс-рэлізе.

Прапануецца пакінуць такія змены ў сіле да 16 кастрычніка 2024 года.

У дадатак да абмежаванняў, устаноўленых у рамках рэжыму надзвычайнага становішча, пасля таго, як вясной Сойм прыняў папраўкі да Закона аб грамадскай інфармацыі, Літоўская камісія па радыё і тэлебачанні і Інспекцыя па журналісцкай этыцы атрымалі больш паўнамоцтваў для рэагавання на распальванне вайны і на прапаганду.

Са свайго боку, калегі па фракцыі Юозапайціса Лаўрынас Кашчунас і Андрус Купчынскас прапануюць падоўжыць тэрмін, на працягу якога Інспектар па журналісцкай этыцы можа закрыць доступ да вэб-сайтаў, якія распальваюць вайну і нянавісць. Дзейны цяпер трохдзённы тэрмін палітыкі прапануюць прадоўжыць да 14 сутак шляхам унясення паправак у Закон аб грамадскай інфармацыі.

Канчатковае рашэнне аб падаўжэнні надзвычайнага становішча павінен прыняць Сойм у наступны аўторак.