Паўлу Белавусу прад’яўлена абвінавачанне па шэрагу артыкулаў Крымінальнага кодэкса Беларусі, піша Белта.

Як распавёў начальнік упраўлення Следчага камітэта па Мінску Сяргей Паско «пад выглядам культурна-гістарычнага развіцця ў розных агульнадаступных сацыяльных сетках і на сайтах ён (заснавальнік крамы symbal.by Павел Белавус — заўв. рэд.) распаўсюджваў ідэі беларускага нацыяналізму, мэтай якіх была змена дзяржаўнай улады ў Беларусі. Абвінавачаны зарэгістраваўся ў якасці індывідуальнага прадпрымальніка і заснаваў таварыства з абмежаванай адказнасцю (крама па анлайн- і афлайн-продажы тавараў), пасля чаго пачаў праводзіць розныя масавыя мерапрыемствы».

Таксама паведамляецца, што «следствам устаноўлена, што абвінавачаны ў інтарэсах замежных арганізацый для больш хуткай змены дзяржаўнай улады стымуляваў варожасць суайчыннікаў у адносінах да Радзімы. Сваімі злачыннымі дзеяннямі Павел Белавус на працягу дзесяці гадоў ставіў пад пагрозу знешнюю і ўнутраную бяспеку дзяржавы <...> На хвалі пратэстнага руху ў 2020 годзе фігурант выйшаў на новы ўзровень. Распрацаваўшы інфармацыйную прадукцыю, у тым ліку фота і відэа, ён рыхтаваў грамадзян да ажыццяўлення самых радыкальных дзеянняў».

Па выніках расследавання 35-гадоваму мужчыне прад’яўлена абвінавачанне па наступных артыкулах Крымінальнага кодэкса: ч.1 арт.356 (здрада дзяржаве); ч.1 арт.342 (арганізацыя і падрыхтоўка дзеянняў, якія груба парушаюць грамадскі парадак); ч.3 арт.361 (заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь); ч.1 арт.361-1 (кіраўніцтва экстрэмісцкім фармаваннем).

Расследаванне крымінальнай справы завершана, матэрыялы перададзены пракурору для накіравання ў суд.