Белыя чарніцы — незвычайная знаходка інспектараў Бярэзінскага запаведніка

Падчас патрулявання тэрыторыі Ражнянскага лясніцтва ля балота сярод зараснікаў чарнічніка інспектары аддзела аховы жывёльнага свету, вадаёмаў і паляўнічай гаспадаркі знайшлі хмызнячкі белых чарніц. Незвычайны белы колер ягад — гэта генная мутацыя гэтага віду раслін. У такіх ягадах адсутнічае пігментнае рэчыва антацыян, якое адказвае за цёмна-сінюю афарбоўку. Таму плады становяцца бясколернымі, то бок белымі. На смак чарніцы-альбінос нічым не адрозніваюцца ад звычайных чорных. Аднак не варта блытаць белыя ягады чарніц з падобнымі да іх атрутнымі пладамі дэкаратыўнага хмызняку снежнаягадніка белага!

Апошні раз такая рэдкая з’ява фіксавалася батанікамі Бярэзінскага біясфернага запаведніка ў 1979 годзе — больш за 40 гадоў таму! Навукоўцы нават спрабавалі перасадзіць адзін кусцік белых чарніц у запаведны дэндрапарк, але ён там ягад не даваў. А мясцовыя жыхары кажуць, што бачаць незвычайныя чарніцы ў тым самым месцы ўжо не адзін дзясятак гадоў. Рэкамендуецца не збіраць такія ягады звыклым спосабам, то бок абіраючы ўсю курціну, а даць магчымасць насенню расліны распаўсюдзіцца. Тады верагоднасць зноў сустрэць белыя чарніцы ў Бярэзінскім запаведніку з кожным годам будзе ўсё вышэйшая.