Агенцыя «Blair partnership», якая валодае правамі на выданне кніг пра Гары Потэра, адмовіла выдавецтву «Янушкевіч» у дазволе на пераклад і выданне 4-й і наступных кніг пра Гары Потэра на беларускай мове. На сайце Change.org з’явілася петыцыя з заклікам да агенцыі Blair Partnership перагледзець сваю адмову выдавецтву «Янушкевіч» працягваць выдаваць кнігі серыі.

«Мы разумеем, што на гэтае рашэньне паўплывала прызнаньне датычнасьці рэжыму Лукашэнкі да ваенных злачынстваў ва Ўкраіне і статус Беларусі як суагрэсара. Аднак мы хацелі б падкрэсліць, што запыт на гэтыя пераклады паходзіць ад асоб, якія супрацьстаяць рэжыму Лукашэнкі й падтрымліваюць Украіну, выступаючы за дэмакратыю ў Беларусі», — напісана на сайце Change.org.

Аўтары петыцыі свой заклік да агенцыі перагледзець рашэнне падмацоўваюць шэрагам аргументаў выкладзеных у чатырох пунктах. Сярод іншага тлумачыцца сітуацыя з закрыццём выдавецтва «Янушкевіч» у Беларусі, пераслед выдаўца, сітуацыя з беларускай мовай і падкрэсліваецца важнасць магчымасці чытаць дзецям Гары Потэра на іх роднай мове.

Азнаёміцца з поўным тэкстам петыцыі і падпісаць яе можна па спасылцы.