Мы гаворым Новы год і маем на ўвазе асаблівую атмасферу, пах ігліцы і мандарынаў, і, вядома, падарункі. Пра што трэба памятаць, каб набытыя ці створаныя вамі рэчы па-сапраўднаму радавалі родных, калег і сяброў? Разбіраецца «Звязда».
Фота: pixabay.com
— Новы год — свята, якое не толькі для дзяцей, але і для дарослых заўсёдызвязана з магіяй, чараўніцтвам, — пераканана псіхолаг Таццяна Шаранда. — Таму важна, каб самы просты падарунак змяшчаў нейкі сюрпрыз, каб ён быў незвычайна паднесены. Адна дзяўчына распавяла мне, у якое захапленне прыйшоў яе хлопец, калі на Новы год яна ўручыла яму вялікі гелевы шар з яго партрэтам, а маму прымусіла нават праслязіцца звязанымі з воўны ёлачнымі рознакаляровымі шарамі. Здавалася б, гэтыя рэчы недорага каштавалі, але пакарылі сваёй арыгінальнасцю, — у іх адбілася шчырасць і глыбіня пачуццяў, гатоўнасць памарнаваць час, паднапружыць фантазію, каб прыемна здзівіць дарагіх, каханых людзей. Нават выпечаныя традыцыйныя піражкі могуць запомніцца на ўсё жыццё, калі ўкласці туды нейкія сюрпрызы і разыграць паміж гасцямі! Шмат у каго незалежна ад узросту, святкаванне Новага года трывала асацыюецца з зіготкімі навагоднімі цацкамі, гірляндамі, феерверкамі і бэнгальскімі агнямі — Святлом, якое адольвае Цемру. Таму не бойцеся дарыць усё бліскучае, іскрыстае, пераліўнае: яно выдатна падыдзе для стварэння выключнай, чароўнай, казачнай атмасферы.
Некалькі парадаў, каб выбраць удалы падарунак:
— У перыяды нестабільнасці, нявызначанасці, катаклізмаў, напружанасці ўзрастае сіла прымет, — падкрэслівае псіхолаг Таццяна Шаранда. — Таму, калі хтосьці з вашых родных ці знаёмых адрозніваецца забабонасьцю, не варта дарыць ім на Новы год ручнікі (лічыцца, што гэта да канфліктаў, няўдач, праблем у сям’і) ці дарыць пустыя кашалькі (да безграшоўя). Дрэнная «рэпутацыя» ў насовак, быццам бы яны — да слёз, а таксама ў нажоў, відэльцаў, нажніц: эзатэрыкі сцвярджаюць, што у колючых і рэжучых прадметаў- адмоўная энергія. Я, напрыклад, люблю свечкі — дэкаратыўныя, араматычныя, самых розных формаў і колераў. Але чытала, што яны таксама ўваходзяць у «чорны спіс»: нібыта, дарыць іх — да нездароўя. Таму на ўсялякі выпадак праверце рэч на добрую энергетыку і «добранадзейнасць».
Уменне стварыць свята пры любых даходах, у любых умовах — сапраўдны талент. Але хто будзе спрачацца з відавочным: грошы і час прыкметна аблягчаюць гэтую задачу. Грошы дазваляюць не скупіцца і ўвасабляць мары блізкіх і родных. Калі сродкаў дастаткова, і вы гатовы не пастаяць за коштам, то чаму б не парадаваць бацькоў пуцёўкай у санаторый, жонку — новай футрай або дарагімі ўпрыгожваннямі, а дачку — айфонам? Але калі ваша прозвішча не Ракфелер, і вы старанна плануеце выдаткі, то лепш загадзя скласці спіс, каму і што вырашылі падарыць, каб адшукаць, купіць ці вырабіць самастойна нешта даступнае, але пры гэтым арыгінальнае, эксклюзіўнае, незабыўнае. Інакш давядзецца ў апошнія дні напярэдадні свята ліхаманкава скупляць непатрэбныя рэчы.
Пераканана: пошук і набыццё падарункаў могуць успрымацца не як цяжар і пакутлівая павіннасць, а як прыемны і цудоўны занятак. Пры такім падыходзе свята для вас пачнецца задоўга да бою курантаў і не завершыцца адразу пасля таго, як вы падымеце келіхі і загадаеце запаветныя жаданні.