Дні перад Калядамі – самыя чароўныя! Столькі ўсяго прыемнага і цікавага адбываецца ў гэты час! Напрыклад, 16 снежня ў дзіцячай біблятэцы №2 і 19 снежня ў Цэнтральнай дзіцячай бібліятэцы імя Астроўскага адбыліся выступы лялечнага тэтрыка “Лямцавая батлейка”. Чытачы бібліятэк пабачылі спектакль “Мама Му, Крумкач і Каляды” паводле кніг шведскай пісьменніцы Юі Вісландэр.
Утульная прастора бібліятэкі, напоўненнай самымі рознымі кніжкамі, спрыяла казачнаму настрою на сустрэчы. Перад спектаклем была праведзена невялічкая моўная гульня, падчас якой дзеткі і дарослыя добра засвоілі адмысловыя беларускія словы. Актыўныя ўдзельнікі віктарыны атрымалі падаруначкі ад кампаніі “Будзьма беларусамі!”, ў межах якой адбываліся выступы. Важныя падарункі – кніжкі на беларускай мове – былі таксама ўручаны прадстаўніцам бібліятэк. Добрых кніг многа не бывае! Дарэчы, пасля спектакля дзеці абяцалі, а некаторыя і паспелі, узяць кніжкі дадому.
Скончыўся спектакль не толькі гучнымі апладысментамі, а яшчэ і салодкімі падарункамі ад Мамы Му – малочнымі кармелькамі для кожнага, хто паглядзеў спектакль.
Свята пачынаецца!!!
Да пабачэння! Да новых сустрэч! Чытайце кніжкі на роднай мове!
Калі Вы жадаеце, каб вясёлая Мама Му, у выкананні “Лямцавай батлейкі” прыехала да вас у вашую школу ці бібліятэку і арганізавала сапраўднае шоў для дзетак альбо дарослых, пішыце на скрыню [email protected], і ваш зварот не застанецца без увагі.
Спектакль “Мама Му” ўжо прайшоў з поспехам у розных гарадах і рэгіёнах Беларусі (Мінск, Брэст, Дзяржынск, Слуцк, Заслаўе, Ждановічы, Мар’іна Горка). А патэнцыйным арганізатарам паведамляем, што пастанова разлічана на школьнікаў малодшага ўзросту.
Коратка пра аўтарку. Юя Вісландэр (Jujja Vislander) – шведская дзіцячая пісьменніца (нарадзілася ў 1944г.), вядомая сваімі вясёлымі гісторыямі аб цудоўнай і адважнай гарэзе – карове Му, яе сябру-хвальку крумкачы Краксе, ды іх сумесных прыгодах. У 2005 г. творчы дуэт Юі і Тумаса Вісландэраў быў угараваны прэміяй імя Астрыд Ліндгрэн.
