Трагічны выпадак адбыўся ў Парыжы. 84-гадовы фатограф Рэнэ Рабэр памёр пасля дзевяці гадзін агоніі ў самым цэнтры Парыжа, бо ніхто з мінакоў не палічыў патрэбным спыніцца, каб аказаць яму дапамогу.
Фота: twitter.com/mompontet
Пра смерць фатографа распавёў ягоны сябар, журналіст і музыка, Мішэль Момпантэ. Вечарам у сераду 19 студзеня фатограф выйшаў прагуляцца недалёка ад свайго дома, ён згубіў прытомнасць і ўпаў пасярод вуліцы. Затым ён правёў наступныя дзевяць гадзін, лежачы на зямлі, і ніхто не прыйшоў яму на дапамогу.
«Ён заставаўся адзін, на зямлі, у прытомнасці, прынамсі, першыя пяць-шэсць гадзін у адным з самых ажыўленых раёнаў Парыжа, і ніхто не палічыў патрэбным умяшацца», — распавёў Мішэль Момпантэ.
Толькі праз 9 гадзін яму паспрабавалі аказаць дапамогу. Хуткую выклікаў бяздомны, які звярнуў увагу на тое, што стары ляжыць на зямлі ў тым жа становішчы. Аднак, на жаль, было ўжо позна. У бальніцы канстатавалі смерць Рэнэ Рабера. Фатограф, вядомы на ўвесь свет сваімі здымкамі фламенка, памёр ад пераахаладжэння.
«Ці ўпэўнены я на 100%, што калі б сутыкнуўся з гэтай сцэнай, я б спыніўся? Я ніколі не адварочваўся ад ляжачага бамжа? [...] мы адводзім вочы. Што гаворыць гэты трагічны канец жыцця, дык гэта асбсалютна агідную рэч аб нашых паводзінах і нашай салідарнасці ў адносінах да таго, хто побач,» — пракаментаваў гэты выпадак Мішэль Момпантэ на Francetvinfo.
Вось тут можна паглядзець працы фатографа.
