Фільм Дар’і Жук працягвае заваёўваць узнагароды кінафестываляў. 16 жніўня адбылася цырымонія закрыцця фестывалю расійскага кіно ў Выбаргу «Акно ў Еўропу», дзе стужка «Крышталь» была ўганараваная галоўным прызам у конкурсе «Капрадукцыя. Акно ў свет» і прызам Гільдыі кіназнаўцаў і кінакрытыкаў Расіі. У Беларусі фільм выходзіць у шырокі пракат з 30 жніўня.
У конкурсе «Капрадукцыя. Акно ў свет» узялі ўдзел 9 карцін, створаных у капрадукцыі з Расіяй. У іх ліку — сямейная меладрама Сяргея Ліўнёва «Ван Гогі», авантурная трагікамедыя Андрэса Пуустусмаа «Зялёныя каты», анімацыйная казка «Гурвінэк. Чароўная гульня» і іншыя. Цягам фестывалю «Крышталь» уваходзіў у лік фаварытаў і атрымаў захопленыя водгукі гледачоў і прэсы.
«Найлепшае з таго, што паказала за першыя два дні «Акно ў Еўропу», — гэта «Крышталь» (…) Лаканічны, гранічна верагодны — у асобах, дэталях, рэпліках, у паваротах сюжэту — смешны, страшны, адчайны і небеспрасветны, тым не менш, фільм», — піша кінакрытык Вольга Галіцкая.
«Крышталь» (…) гэта новы галоўны фільм пра нашыя 90-я пасля «Брата». Я пайду пакуль аддыхацца, а вы запомніце гэтую назву», — паведаміў у сябе на старонцы ў Facebook кінакрытык Ягор Белікаў.
«Фільм «Крышталь» мінчанкі Дар’і Жук — пакуль найлепшае, што я ўбачыў на Выбаргскім фестывалі… Такое адчуванне, што на экране не кіно, а згустак жывога, неапрацаванага, бруднага, потнага, жабрацкага жыцця, у якім няма чым заплаціць за тэлефон, а вячэру штовечар даводзіцца здабываць браканьерскім спосабам у рацэ, што цячэ побач… Але фільм Дар’і Жук — не рэтра пра ліхія 90-я, а выказванне пра сённяшняе і вечнае. Пра сутыкненне мары і рэальнасці, пра дыктатуру побыту і прагу свабоды, пра духоўную культуру і векавую, укарэненую ў жыццёвых порах сярэднявечную дзікасць», — адклікаецца пра фільм кінакрытык Леанід Паўлючык.
Поспех карціны ў Выбаргу канчаткова замацаваў вердыкт журы пад старшынствам выбітнага армянскага рэжысёра Аруцюна Хачатрана. Выканаўца галоўнай ролі Аліна Насібуліна двойчы падымалася на сцэну па ўзнагароды.
Фестываль «Акно ў Еўропу» — найстарэйшы нацыянальны кінафестываль у Расіі, адно з самых аўтарытэтных мерапрыемстваў у краіне ў сферы кінаіндустрыі. Кінафорум быў заснаваны ў 1993 годзе класікамі кінематографа Марленам Хуцыевым, Савам Кулішом і Мікаэлам Тарывердзіевым.
Фільм «Крышталь» працягвае падарожжа па свеце, ён запрошаны яшчэ на больш чым 20 кінафестываляў: у Вялікабрытаніі, Германіі, ЗША, Егіпце і іншых краінах.
Перадпрэм’ерны паказ фільма ў Мінску з удзелам рэжысёра пройдзе 27 жніўня ў кінатэатры Falcon Club Буцік Кіно, прэм’ера — 29 жніўня ў кінатэатры «Масква», пасля чаго фільм выходзіць у шырокі пракат. Квіткі ўжо ў продажы на сайце ByCard і ў касах кінатэатраў.
Глядзіце таксама:
