Мінскі гадзіннікавы завод «Луч» выпусціў лімітаваную калекцыю гадзіннікаў «Ван Гог» у гонар 170-годдзя мастака-постімпрэсіяніста Вінцэнта Ван Гога.
Калекцыю прадставілі чатырма мадэлямі, кожная з якіх прысвечана адной з карцін мастака: «Зорная ноч», «Аўтапартрэт у саламяным капелюшы», «Квітнеючыя галінкі міндаля» і «12 сланечнікаў у вазе». Кожная мадэль гадзінніка выканана ў стылі адпаведнай карціны і мае свой унікальны дызайн. Ва ўсіх мадэляў цыферблат ручной працы, корпус выкананы з нержавеючай сталі. Папружка гадзін зроблены з натуральнай скуры, на вонкавым баку каторай выціснуты подпіс Ван Гога.
Кошт гадзінніка — 399 рублёў.
