Рэжысёра асудзілі да года пазбаўлення волі з адбываннем у папраўчай калоніі ва ўмовах агульнага рэжыму за пост «ВКонтакте» свастыкі на фоне дзяржаўнага сцяга, паведамляюць праваабаронцы. Таксама ў Дзмітрыя канфіскавалі ноўтбук Asus як сродак здзяйснення злачынства.
Прысуд быў вынесены ў судзе Салігорскага раёна 28 сакавіка. Дзмітрыя абвінавацілі па арт. 370 Крымінальнага кодэкса (здзек над дзяржаўнымі сімваламі) за тое, што запосціў «ВКонтакте» малюнак свастыкі на фоне дзяржаўнага сцяга.
Згодна версіі абвінавачвання, Дзмітрый Панцялейка ў кастрычніку 2021 года з дапамогай ноўтбука размясціў у двух акаўнтах «ВКонтакте» малюнак дзяржаўнага сцяга Рэспублікі Беларусь, на фоне якога была размешчана свастыка. Гэтыя дзеянні кваліфікавалі як здзек над дзяржаўнымі сімваламі.
