Кафедра беларусістыкі Варшаўскага ўніверсітэта адкрывае набор на новую праграму паслядыпломнай адукацыі. Курс «Польская мова як замежная ў кантэксце ўсходнеславянскіх моў» разлічаны на тых, хто хоча стаць настаўнікам польскай мовы і выкладаць яе для замежнікаў. Падыдзе кірунак і асобам, якія ўжо ў прафесіі, але жадаюць павысіць сваю кваліфікацыю.
На кафедры беларусістыкі новую праграму называюць унікальнай: курс распрацаваны менавіта з улікам спецыфікі работы з асобамі, якія размаўляюць на беларускай, украінскай або расійскай мовах. На занятках распавядуць, як выкарыстаць і адначасова не заблытацца са сваімі вучнямі ў моўных падабенствах ды сканцэнтруюцца на пракытчных ведах і кампетэнцыях.
Лекцыі будуць чытаць выкладчыкі кафедры беларусістыкі Варшаўскага ўніверсітэта — прафесар Радаслаў Калета, кандыдаты філалагічных навук Вольга Трацяк, Катажына Дрозд і Ганна Сівірская. Гэта дасведчаныя спецыялісты, якія ўжо шмат гадоў працуюць са студэнтамі з Беларусі, Расіі, Украіны і іншых краін.
Кафедра беларусістыкі Варшаўскага ўніверсітэта. Крыніца: facebook.com/bialorutenistyka
Запланаваныя заняткі па культуры і стылістыцы польскай мовы, метадам яе навучання і параўнальнай граматыцы. Абавязкова раскажуць і пра культуру Польшчы. Агулам — 10 прадметаў, якія дапамогуць атрымаць неабходныя веды для працы настаўнікам польскай мовы як замежнай.
Паслядыпломная праграма разлічаная на 2 семестры і 180 навучальных гадзін. Сустрэчы — а гэта 2-3 спатканні на месяц — будуць адбывацца па суботах да 9.00 да 18.00 у будынку факультэта прыкладной лінгвістыкі на вуліцы Dobra, 55. Кошт навучання — 4000 злотых.
Хто можа паступіць?
Асобы, якія ведаюць польскую мову. Яе валоданне спраўдзяць на адмысловым сумоўі.
Дадатковай перавагай будзе веданне адной з усходнеславянскіх моў або або жаданне працаваць са студэнтамі, якія штодзённа карыстаюцца адной з усходнеславянскіх моў.
Таксама кандыдат абавязаны мець дыплом магістра або бакалаўра. У выпадку з абітурыентамі беларускіх навучальных устаноў — гэта дыплом ВНУ.
Прыём дакументаў будзе працягвацца да 6 кастрычніка. Усю падрабязную інфармацыю можна знайсці на сайце інтэрнэт-рэгістрацыі абітурыентаў Варшаўскага ўніверсітэта.
Budzma.org
