17 лістапада 1990 г. У Вільні адбылося ўрачыстае адкрыццё шыльды ў гонар Францішка Скарыны. Гэта была першая шыльда, усталяваная беларускаму дзеячу пасля атрымання Літоўскай Рэспублікай незалежнасці.

Фота: Радыё Рацыя

Шыльда знаходзіцца на будынку па адрасе Didzioji, 19 блізу сталічнай ратушы амаль у самым цэнтры Вільні.

Гэты будынак вядомы з XVI стагоддзя, калісці належыў віленскаму бурмістру Якубу Бабічу, дзе першадрукар заклаў сваю майстэрню. Першую беларускую кнігу Скарына выдаў у Празе ў жніўні 1517 года і гэта быў «Псалтыр». Памятны знак нагадвае жыхарам і гасцям Вільні, што ў 1520 годзе беларускі першадрукар з Прагі перавёз у Вільню друкарню і распачаў першую справу кнігадруку ва Усходняй Еўропе, на Радзіме — у Вялікім Княстве Літоўскім.

Каля 1522 г. выдаў «Малую падарожную кніжку», якая складаецца мінімум з 21 часткі. Акрамя друкарскай справы служыў сакратаром віленскага біскупа Яна, быў знаёмы з рэфарматарам Марцінам Лютэрам. Дакладная дата і месца смерці Скарыны невядомыя, даследчыкі ўказваюць прыкладна 1550 — 1551 год, а месца смерці — Прага, куды Скарына перабраўся зноўку напрыканцы 1530-х гадоў як доктар батанікі.