Навукоўцы: каранавірус можа захоўвацца на марлевых масках да тыдня

Навукоўцы высветлілі, як доўга новы каранавірус можа захоўвацца пры пакаёвай тэмпературы на розных паверхнях, паведамляе South China Morning Post са спасылкай на даследаванне Ганконскага універсітэта.

Каранавірус SARS-CoV-2, які выклікае Covid-19, можа захоўвацца на паверхнях з нержавеючай сталі або пластыка ад чатырох да сямі дзён, на вонкавым боку марлевай маскі — да тыдня, высветлілі навукоўцы.

«Менавіта таму вельмі важна, каб пры нашэнні маскі вы не дакраналіся да яе вонкавага боку. Інфекцыя можа трапіць на вашы рукі, а калі вы дакранецеся да вачэй, то перададзіце вірус праз іх», — гаворыцца ў даследаванні.

Пасля выкарыстання маску лепш загарнуць у асобны пакет і выкідаць толькі ў закрыты кантэйнер. Пасля працэдуры рукі неабходна дэзынфекаваць

На друкаванай і папяроснай паперы вірус пражыў менш за тры гадзіны, на апрацаваным дрэве і тканіне — стандартнай баваўнянай лабараторнай куртцы — ён знік на другі дзень, а са шкла і банкнот — на чацвёрты.

Акрамя таго, падчас даследавання высветлілася, што дэзінфікуючыя сродкі, уключаючы адбельвальнікі, здольныя забіваць каранавірус. Пры гэтым самым надзейным метадам прафілактыкі навукоўцы ўсё роўна называюць частае мыццё рук.

Колькасць выяўленых выпадкаў заражэння Covid-19 па ўсім свеце перавысіла 1,2 мільёна чалавек. У нашай краіне ўчора было зафіксавана 562 выпадкі каранавіруса — такую лічбу агучыла Міністэрства аховы здароўя.



Сачыце за нашымі публікацыямі ў TelegramFacebookВконтакте ды Twitter! А ў нашым Instagram вас чакаюць яскравыя фота!