Выстава «Космас Язэпа Драздовіча» адкрылася ў Нацыянальным мастацкім музеі. Экспазіцыя, прымеркаваная да 135-годдзя з дня нараджэння беларускага Леанарда, будзе працаваць да 16 кастрычніка, і вось чаму на яе варта схадзіць.
Язэп Драздовіч — адна з найбольш загадкавых персон беларускай культуры і мастацтва. Таленавіты мастак, але яшчэ і выдатны скульптар, самабытны пісьменнік і паэт, настаўнік, этнограф, фалькларыст, філосаф, хірамант, археолаг, астраном. Маштаб яго асобы быў надзвычайным!
Язэп Драздовіч, Сустрэча вясны на Сатурне. 1932
Ці не самай эксцэнтрычнай стыхіяй мастака стаў космас. Драздовіч вывучаў астраномію і нават выдаў папулярную кнігу ўласных разваг пра касмічную прастору «Нябесныя бегі» на беларускай мове.
Язэп Драздовіч, Артополіс. Горад палацаў (Artapolis). 1934–1935
Да дня нараджэння майстра, які з'явіўся на свет 13 кастрычніка, у Нацыянальным мастацкім музеі будзе працаваць выстава «Космас Язэпа Драздовіча». На ёй сабралі творы з калекцыі Цэнтра даследаванняў беларускай культуры, мовы і літаратуры.
На экспазіцыі можна ўбачыць карціны, якія з’яўляюцца часткай знакамітых “касмічных серый” Драздовіча, а таксама работы, дзе мастак праявіў свой талент партрэтыста. Усяго на выставе экспануецца восем жывапісных твораў, а таксама два барэльефы. Частку з іх глядач адкрые для сябе ўпершыню.
Язэп Драздовіч, Астран-абсерваторыя з квадрантам на кольцы Сатурна, 1923
Язэп Драздовіч, Аўтапартрэт, 1943
Варта звярнуць увагу і на тое, што ў межах падзеі 11 кастрычніка ў Нацыянальным мастацкім пройдзе круглы стол, на якім навукоўцы і даследчыкі прачытаюць свае даклады, прысвечаныя маштабнай фігуры мастака.
Чытайце яшчэ: Язэп Драздовіч. Да Космасу праз «магнетыстычныя сны» у беларускіх вёсках
