Напрыканцы верасня ў Гродне на продаж былі выстаўленыя два будынкі былых казармаў 1914 года па вул. Шчорса 2 і 4. 

Комплекс казармаў пачалі будаваць напрыканцы ХІХ ст. Да пачатку Першай сусветнай вайны ў казармах быў на пастоі 102 Вяцкі полк, з пачаткам баявых дзеянняў ён быў высланы на лінію фронту. Тады ў казармах размясціўся палявы шпіталь і нязначная частка вайсковых падраздзяленняў. 

За «польскім часам» будынкі казармаў гродзенцы ведалі, як «Легіянерскія казармы», і тут знаходзіўся Лідскі полк імя Нарбута. Пасля заходняга паходу Чырвонай арміі ў верасні 1939 года ў будынках казармаў размясціліся чырвонаармейцы. Пасля акупацыі Гродна нямецкімі войскамі тут трымалі некалькі тысяч палонных лагера «Шталаг 324». 

Абедзве пабудовы маюць два паверхі, па ўмовах аўкцыёну іх мусяць рэканструяваць пад аб’ект шматкватэрнай жылой забудовы. Будынак былой казармы па вул. Шчорса, 2 ацанілі ў 1 439 186 рублёў, па вул. Шчорса, 4 — у 1 256 803 рублёў. Аўкцыён быў прызначаны на 20 кастрычніка, але так і не адбыўся — не знайшлося пакупнікоў. 

Прыклады паспяховага аднаўлення будынкаў былых казармаў у Гродне ўжо ёсць. У сакавіку 2020 года побач з будынкамі былых казармаў адкрылася пляцоўка «Kazzarma Mall», будынак такой жа былой казармы быў выкуплены бізнэсоўцамі і рэканструяваны пад сучасны гандлёва-забаўляльны цэнтр. 

Гэтая практыка прыйшла ў Гродна з суседняга польскага Беластока, дзе будынак былой фабрыкі перарабілі пад вялікі гандлёвы цэнтр «Galeria Alfa».

budzma.org