У сакавіку грамадская культурніцкая кампанія “Будзьма беларусамі!” і Цэнтр даследавання грамадскага кіравання SYMPA абвясцілі ў Оршы Кірмаш праектаў дзеля паляпшэння культурнай прасторы горада.

І жыхары Оршы не ўпусцілі магчымасці прапанаваць адметныя і цікавыя ідэі, каб жыццё горада завіравала на новым узроўні.

Сам Кірмаш праектаў праходзіць у тры этапы: збор праектаў, прэзентацыя, адбор і абвяшчэнне пераможцаў. Першы этап ужо завершаны: у конкурсе ўдзельнічаюць 3 абсалютна розныя ідэі.

Зараз адбудзецца другі этап – публічная прэзентацыя праектаў, падчас якой аўтары змогуць атрымаць прафесійныя парады па іх дапрацоўцы і рэалізацыі, а ўдзельнікі – ацаніць, наколькі кожны праект запатрабаваны і цікавы самім гараджанам.

3 праекты – 3 адметныя магчымасці для кожнага ахвотнага далучыцца да паляпшэння атмасферы, у якой мы жывем штодня.

Сярод праектаў прадстаўленыя школа бізнесу для пачаткоўцаў, стварэнне ў Оршы арт-прасторы, спартовы турнір па цікавай гульні.

Дзякуем аўтарам за цудоўныя ідэі і заклікаем іх актыўна рыхтавацца да прэзентацыі, якая адбудзецца 18 красавіка у канферэнц-зале гасцініцы “Орша”.

А ўсіх неабыякавых  жыхароў горада запрашаем узяць актыўны ўдзел у абмеркаванні і адборы праектаў.

Кожны праект будзе ацэньвацца па 10-бальнай шкале як экспертамі, так і прысутнай аўдыторыяй, таму ваш голас будзе мець вагу і значэнне ў далейшым лёсе прадстаўленых ідэй. Пасля прэзентацыі вынікі галасавання будуць апублікаваныя на сайце кампаніі.

Справа знойдзецца для кожнага, бо Кірмаш праектаў – гэта месца, дзе збіраюцца аўтары, крытыкі, партнёры.

Чакаем вас 18 красавіка (серада) у канферэнц-зале гасцініцы “Орша” (вул. Міра, 11).

Пачатак у 18:30.

Уваход вольны!

Даведкі: +37529 319-93-09, www.budzma.by.