Цяпер у Беларусі за адукацыю будуць плаціць столькі ж, колькі і ў Нідэрляндах. Хаця якасьць навучаньня па-ранейшаму моцна адстае ад галяндзкай. Чыноўнікі і БТ спрабуюць супакоіць студэнтаў і іх бацькоў, у той час як апошнія імкнуцца закрыць новыя «адукацыйныя» дзіркі ва ўласных бюджэтах.
У разгар зімняй сэсіі студэнты даведаліся, што цяпер за навучаньне прыйдзецца выкладаць на 20–25% болей, чым раней. У БДУ кошты паднялі на 26%, у БДУІР — на 20%. Напрыклад, будучыя палітолягі-юрысты з БДУ цяпер мусяць плаціць за год навучаньня амаль $2 000, юрысты амаль на $300 болей.
У БДУІР аплату паднялі зь лістападу, але паведамілі пра тое толькі цяпер. У выніку адукацыя на найбольш папулярных факультэтах унівэрсытэту каштуе 1 700 даляраў
Рашэньне аб падвышэньні аплаты было прынятае яшчэ да Новага году, але даведаліся аб ім студэнты толькі цяпер. Прычым ва ўсіх унівэрсытэтах аплату паднялі не з наступнага сэмэстру, а з гэтага. У некаторых выпадках студэнтам прыйдзецца даплочваць нават за два папярэднія месяцы, якія яны, ні аб чым не здагадваючыся, адвучыліся ў ВНУ.
