18 мая музыку, нязменнаму лідару гурта «Neuro Dubel» Аляксандру Кулінковічу мусіла споўніцца 52 гады. З нагоды гэтай даты, у памяць аб творцу сабралі цікавыя факты з ягонага творчага жыцця, а таксама прыгадалі, што казаў Кулінковіч пра жанчын, рыбалку і тыповых беларусаў.
Меў два псеўданімы
Аляксандр Кулінковіч нарадзіўся 18 траўня 1972 года ў Смалявічах. Пасля школы атрымаў адукацыю сантэхніка. Пазней паступіў у БДУ на факультэт журналістыкі, але адвучыўся толькі 1 курс, што не зашкодзіла пачаць публікавацца ў моладзевых выданнях, пісаць паэтычныя і музычныя творы. Пазней у Аляксандра з’явіліся псеўданімы Куллінковіч, якім ён часта падпісваў свае тэксты, і сцэнічны псеўданім Дзядзя Саша.
Прыдумаў назву гурта ў нейрахірургічным адззяленні
Кулінковіч захапляўся панк-рокам, а любімым гуртом былі «Sex Pistols». У 1989 годзе Аляксандр падчас наведвання нейрахірургічнага аддзялення вырашае стварыць гурт пад назвай «Neuro Dubel», назву прыдумалі па аналогіі з «Sex Pistols».
Хаця першапачатковая назва гучала, як «Убить осетина», але ад яе калектыў хутка адмовіўся, бо шмат хто ўспрымаў яе як заклік да гвалту. Праз два гады, у кастрычніку 1991 года гурт даў свой першы канцэрт у Маскоўскім рок-бары. З канца 1994 года, пасля значных зменаў у складзе музыкаў, гурт пачаў сур’ёзна займацца канцэртнай дзейнасцю. У 1995 годзе гурт Кулінковіча запісаў першы альбом «Умные вещи».
Дзве «Рок-кароны», узнагарода ад Шаўчука, 16 альбомаў амаль за 30 год
«Neuro Dubel» выступае на шматлікіх фэстах і конкурсах. Ядвіга Паплаўская і Аляксандр Ціхановіч запрасілі гурт прыняць удзел у канцэрце «Поп-ТВ» у Палацы спорту. Музыкі ўдзельнічаюць у «Рок-Каранацыі» 1995 — 1996 гадоў, тады ж яны былі ўзнагароджаны спецыяльным прызам Ленінградскага рок-клуба і гурта Юрыя Шаўчука «ДДТ». «Neuro Dubel» двойчы перамагаў і атрымліваў «Рок-карону» у 1998 і 2007 гадах.
За амаль 30 гадоў існавання гурта музыкі выпусцілі 16 альбомаў. Частка «Дзюбеляў» на чале з Кулінковічам у 2016 годзе стварылі акустычны праект «ВелосипедистоВ», які выконваў песні «Neuro Dubel», а таксама кампазіцыі, напісаныя Аляксандрам Кулінковічам спецыяльна для новага гурта. Пасля смерці Аляксандра Кулінковіча песні ў абодвух гуртах выконваў бэк-вакаліст Юры Навумаў. 14 верасня 2020 года не стала і яго. Пасля чаго і «Дзюбелі», і «ВелосипедистоВ» амаль не выступаюць.
Кулінковіч задаваў пытанне Аляксандру Лукашэнку
З 2011 па 2013 гады гурт трапіў у негалосны чорны спіс — творцам з гэтага спісу арганізаваць канцэрт было фактычна немагчыма. 15 студзеня 2013 года на прэс-канферэнцыі Аляксандра Лукашэнкі прагучала пытанне ад Кулінковіча, дзе музыка цікавіўся чаму існуюць гэтыя «чорныя спісы» дзеячаў культуры. Аляксандр Лукашэнка адказаў, што нічога не чуў пра падобныя спісы і даручыў Аляксандру Радзькову і Андрэю Кабякову разабрацца з гэтай сітуацыяй.
Праз 4 месяцы, 6 мая гурт даў канцэрт пасля двухгадовага «перапынку».
Музыка, публіцыст і кінаактор
Кулінковіч пісаў артыкулы для «БелГазеты». Нягледзячы на напружаныя стасункі з некаторымі прадстаўнікамі ўладаў быў калумністам «Советской Белоруссии», сайта Na**ny.by і часопіса «Sexus». З 2012 года часам стаў граць у кіно.
У 2015 годзе зняўся ў фільме Андрэя Курэйчыка «ГараШ», дзе выканаў адну з галоўных роляў — старшэйшага аўтамеханіка, праз год зняўся ў «PARTY-ZAN фильм» таго ж Курэйчыка і выканаў ролю начальніка службы бяспекі кампаніі па распрацоўцы кампутарных гульняў. Усяго зняўся ў 6 фільмах.
Памёр у дзень свайго канцэрта
Не стала Аляксандра Кулінковіча 4 жніўня 2018 г., яму было 46 год. Прычынай смерці стала вострае схаванае запаленне лёгкіх. 1 жніўня, у гурта была рэпетыцыя, музыкі калектыву адзначалі, што, Кулінковіч у той дзень выдатна выглядаў і добра сябе адчуваў. 3 жніўня ён адправіў СМС-паведамленне аднаму з сяброў, дзе напісаў, што дрэнна сябе адчувае і выклікае хуткую.
Пахавалі музыку на вясковых могілках Аннапаль, што на Міншчыне.
Што казаў Кулінковіч пра жанчын, рыбалку і тыповых беларусаў
У 2012 годзе Аляксандр Кулінковіч браў удзел у праекце «Захапленні» ад грамадскай кампаніі «Будзьма беларусамі». Тады разам з Юрыем Навумавым і журналістамі «Будзьмы» ён выправіўся на рыбалку. Прывядзём некалькі яскравых думак, агучаных Кулінковічам падчас той сустрэчы.
Пра рыбалку: У рыбалцы мне больш за ўсё падабаецца той момант, калі цягнеш вуду і абсалютна не ўяўляеш, што выцягнеш. Гэта як скрыначка з падарункам: адкрываеш і не ведаеш, што ў ёй. І як з падарункам: кожны раз верыш, што будзе менавіта тое, пра што ўсё жыццё марыў, што зловіш рыбу, на якую ўсё жыццё паляваў.
Пра жанчын: Жанчыны наогул, як я заўважыў, вельмі агрэсіўныя істоты. Напэўна, таму, што часцяком жанчына пастаўленая ва ўмовы, калі яна павінная быць у два разы лепшая за мужчыну, каб дамагчыся ў два разы менш за яго. Так ва ўсім, і ў рыбалцы ў тым ліку.
Пра тыповых беларусаў: Нікога не хачу пакрыўдзіць, але, як на мяне, тыповы беларус — гэта даволі лянівая і сквапная істота. Прычым гэтыя рысы з’явіліся ў нашым народзе зусім нядаўна. Беларуская сквапнасць — першапрычына ўсіх нашых бедаў. Мы такія бедныя менавіта таму, што такія сквапныя. Сквапныя і лянівыя. Мы не хочам больш зарабіць, мы хочам проста паболей урваць, нічога не робячы. І лянота нашая праз сквапнасць. Звычайна лянота — гэта рухавік прагрэсу, але не ў Беларусі.
Пра сваю «Вялікую рыбу»: Пад фразай «злавіць сваю Вялікую рыбу», таксама разумеюць «зрабіць самае важнае ў жыцці». Дык вось, я яшчэ не злавіў сваю «Вялікую рыбу». Прачніся я заўтра са славай гурта Rammstein, для мяне гэта не будзе «Вялікай рыбай». Не ведаю... Хоць, думаю, што вылаўлю яе, калі калі-небудзь стану такім жа аўтарытэтам, якім для мноства людзей ёсць Пётра Мікалаевіч Мамонаў. Калі пра мяне столькі ж людзей скажа такія ж добрыя словы, як пра яго, я буду ведаць, што зрабіў у сваім жыцці нешта вельмі важнае, што злавіў сваю Вялікую рыбу.
Канцэрт да Дня нараджэння Аляксандра Кулінковіча ў Варшаве
У суботу, 18 траўня, у Варшаве святкуюць дзень народзінаў Аляксандра Кулінковіча.
На сцэну выйдуць яго калегі і сябры — Аляксандр Памідораў, Зоя і Уладзімір Сахончыкі, Алесь Лютыч, Дзяніс Тарасенка і Алесь-Францішак Мышкевіч.
Архіўны тэкст, упершыню апублікаваны 18.05.2022 г., інфармацыя пра канцэрт актуальная
АМ, Budzma.org
