У Мінску пачалі судзіць педагога-рэпетытара Яўгена Лівянта, затрымалі экс-дэпутатку Палаты прадстаўнікоў, экс-кіраўніцу ліквідаванага Таварыства беларускай мовы Алену Анісім, палітзняволеным Аксане Зарэцкай і Багдану Караўцу пакінулі прысуд у сіле.
Патрыцыя Свіціна
15 траўня затрымалі мінскага відэографа Максіма Хекалу.
Мужчына прафесійна займаецца стварэннем відэа і фотаздымкай — сярод яго кліентаў быў футбольны клуб «Крумкачы» (але хлопец там не працуе). Таксама Максім мае бізнэс па арэндзе касцюма панды для вечарын і іншых мерапрыемстваў, але час ад часу ладзіць з ім і дабрачынныя мерапрыемствы, да прыкладу, для дзіцячых дамоў.
Вядома, што Максіма затрымлівалі падчас «Марша адзінства» 6 верасня 2020 года. У відэа сілавікоў ён кажа, што пасля нібыта ладзіў «партызанскія» акцыі ў сваім двары і ваколіцах — вывешваў нацыянальныя сцягі і стужкі ў нацыянальных колерах.
23 траўня ў Вярхоўным судзе разгледзяць апеляцыйную скаргу палітзняволенай Наталлі Дулінай.
Былая дацэнтка кафедры італьянскай мовы МДЛУ, сябра Каардынацыйна рады,Наталля Дуліна была асуджана на 3,5 гады калоніі паводле арт. 342 КК (Актыўны ўдзел у дзеяннях, якія груба парушаюць грамадскі парадак) і ч. 1 арт. 361-4 (Садзейнічанне экстрэмісцкай дзейнасці).
Падтрымайце Наталлю: СІЗА-1. 220030, Мінск, Валадарскага, 2, Наталля Алегаўна Дуліна
Затрыманая Алена Анісім
Вядома, што па экс-дэпутатку прыйшлі на яе працу ў Акадэміі навук.
18 траўня сілавікі затрымалі спявачку Патрыцыю Свіціну, якая ў 2020 годзе адмовілася ад стыпендыі Лукашэнкі.
На «пакаяльным відэа», дзяўчына расказвае, што з’яўлялася лаўрэатам стыпендыі па падтрымцы таленавітай моладзі. У 2020 годзе яна, паводле ўласных слоў, «удзельнічала ў пратэстах», «выходзіла на дарогі» і ў складзе калоны «перакрывала рух транспарту».
Таксама яна кажа, што публікавала ў сацсетках «негатыўныя паведамленні» пра сілавікоў, аб «спецаперацыі, якая праводзіцца на тэрыторыі Украіны» і «распальвала варожасць і нянавісць паміж славянскімі народамі».
19 траўня пачаўся судовы працэс па справе педагога-рэпетытара Яўгена Лівянта.
Па крымінальнай справе разам з Лівянтам праходзяць яшчэ шэсць чалавек, у тым ліку яго жонка і дзеці.
Нагадаем, вядомы рэпэтытар, суўладальнік цэнтру «100 балаў» Яўген Лівянт, яго жонка Юлія, старэйшая дачка Ганна, зяць Мікіта Драздоў і суўладальнік цэнтру Аляксей Іваноў былі затрыманыя напачатку года — іх вінавацяць паводле «народнага» арт. 342 КК.
Палітзняволеным Аксане Зарэцкай і Багдану Караўцу пакінулі прысуд у сіле.
14 сакавіка экспертцы па этыкеце прысудзілі Аксане Зарэцкай прысудзілі 1,5 года калоніі, заснавальніку кампаніі Astronim Багдану Караўцу — 2 гады калоніі. Іх абвінавацілі паводле арт. 342 КК (актыўны ўдзел у групавых дзеяннях, якія груба парушаюць грамадскі парадак).
Аксана — член асноўнага складу Каардынацыйнай Рады, трэнерка па этыкеце і бізнэс-камунікацыях, культуралагіня, магістарка педагогікі. Яна мае дваіх дзяцей, а Багдан выхоўвае дзіця з інваліднасцю.
Падтрымайце іх грашовымі пераводамі, пасылкамі, тэлеграмамі: СІЗА-1, 220030, Мінск, Валадарскага, 2, Зарэцкая Аксана Анатольеўна | Багдан Уладзіміравіч Каравец
21 траўня гомельскі актывіст Ілля Міронаў выйшаў на волю пасля 10 сутак арышту.
Нагадаем, 11 траўня Ілля пайшоў у РАУС на «прафілактычную размову» — пасля яе актывіста і затрымалі.
Таксама ў гэты дзень па ўсім свеце прайшлі акцыі да Дня салідарнасці з палітвязнямі Беларусі.
Чытайце яшчэ: Як можна падтрымаць палітвязняў? Карысныя парады
