Вядомы беларускі рок-музыка разгледзеў на сваёй старонцы ў Facebook перспектывы «вяртання па запрашэнні» творцаў, што вымушана пакінулі Беларусь.

«Ну, ясна. У краіне — дэфіцыт кадраў. Раз’ехаліся па замежжах. І адтуль пішуць у сваіх інтэрнэтах, каменцяць і лайкаюць. І ім за гэта нічога не будзе. Калі яны не вернуцца. Значыцца, трэба іх вярнуць. Каб яны прыехалі, занялі працоўныя месцы і былі пад кантролем. Бо яны ж усе прагнуць вяртання, праўда? У глыбіні душы. Ну то вось хай вяртаюцца, клянуцца ў вечнай вернасці ўладзе і ходзяць па струнцы.

Цяпер возьмем прыклад. Умоўны беларускі музыка з’ехаў з Беларусі, бо хадзіў на маршы, граў у дварах і пасля гэтага паўтара году не меў канцэртаў. На Захадзе (напрыклад, у Польшчы) ён, каб выжыць, уладкаваўся ахоўнікам (мерчэндайзерам, грузчыкам) у гіпермаркет. Пару разоў на месяц грае канцэрты для тутэйшых беларусаў. У перспектыве — стварэнне гітарнае школы (студыі, канцэртовае агенцыі, прадусарскага цэнтру). Хочацца дадому. А тут запрашаюць вяртацца. Што нашага музыку чакае на радзіме пры ўмоўнай адсутнасці розных крымінальных ды адміністратыўных артыкулаў?

Канцэртаў не будзе. Ніякіх. Гэтая дзейнасць пад пільным кантролем. Нават кавер-бэнды цяпер у зоне рызыкі. Узгадняецца рэпертуар і вывучаецца біяграфія музыкі — дзе, калі і з кім граў? Гэты тэст праходзяць далёка не ўсе. Што там казаць пра прадусарскія цэнтры! Застаецца прадаць гітару ды ўладкавацца грузчыкам у гіпермаркет (калі мясцовы ідэолаг дазволіць — з такой сумнеўнай біяграфіяй!).

Таму ўсё болей музыкаў з’язджае з Беларусі. І, пакуль працягваецца цяперашняя сітуацыя, ніхто не збіраецца назад. Яшчэ й цераз тое, што кожны музыка мае сябра ці знаёмага гітарыста-басіста-вакаліста, які зараз сядзіць у турме. Пра якое вяртанне вы там плявузгаеце?!

І гэта толькі адна вузкая музычная сфера. Разумееце?»

Нагадаем, на гэтым тыдні беларускія ўлады прапанавалі вяртацца ў Беларусь змушаным эмігрантам, якія мусяць даказаць сваю лаяльнасць дзяржаве. Пасля разгляду асабістай справы адмысловая камісія вырашыць, ці ёсць прэтэнзіі ў дзяржавы да дзейнасці грамадзяніна да выезду з Беларусі і падчас пражывання па-за Беларуссю.