У канферэнц-зале Музея беларускага кнігадрукавання адбылася прэзентацыя новага музейнага прадмета — мяча XV-XVI стст (часоў ВКЛ), паведамляе прэс-служба МНС.

Унікальную знаходку знайшоў пажарны Полацкага аддзела МНС Аляксандр Брыль у жніўні гэтага года падчас падводнай рыбалкі. У рацэ Заходняя Дзвіна на глыбіні каля 3 метраў на ўчастку паміж мастом у раёне Запалоцця і в. Чарнешчына мужчына знайшоў меч.

— Вырашыў парыбачыць, пашукаць сома на глыбіні, а тут такая знаходка. Выцягнуў, адразу думаў, што гэта навадзел, але затым пачытаў. Аказалася, што зброя часоў Сярэднявечча, — падзяліўся Аляксандр.

Пасля мужчына аднёс меч на працу. І начальнік Полацкага падраздзялення МНС Сяргей Аваднеў перадаў яго ў музейны збор Нацыянальнага Полацкага гісторыка-культурнага музея-запаведніка.

Але перш чым музейны прадмет стане экспанатам, яму неабходна прайсці інвентарызацыю, навуковае вывучэнне і рэстаўрацыю.

— Знаходка вельмі цікавая, раней у нас такіх не было. Гэта своеасаблівая пячатка часу. Агульная даўжыня мяча 128 см, прыкладна 1,6 кг. У выніку даследавання хімічнага складу мяча ўстаноўлена, што лязо і гарда выраблены з загартаванай высокавугляроднай сталі, а наверша — з жалеза. Матэрыялам для вырабу інкрустацыі стала двухкампанентная латунь без дадатковых прымешак, — распавёў рэстаўратар Аляксандр Волкаў.

Работы па рэстаўрацыі і вывучэнні музейнага прадмета працягваюцца.