12 снежня ў горадзе Віцебску ў Арт-Прасторы ў межах кампаніі “Будзьма беларусамі!” прайшлі сумесныя паэтычныя чытанні Алеся Замкоўскага і Уладзя Лянкевіча.
У самым цэнтры Віцебска на вуліцы Талстога ў памяшканні павышанай артыстычнасці, якое апошнім часам становіцца візітоўкай места, у дажджысты суботні надвячорак сабраліся людзі паслухаць вершы.
Першым на правах гаспадара чытаў Алесь Замкоўскі. Публіка надзвычай актыўна адгукалася ці не пасля кожнага верша. Чытанні суправаджала змушаная і нязмушаная гутарка. Так Алесю давялося тлумачыць, чаму ў яго дагэтуль няма кнігі, хоць піша ён даўно і досыць паспяхова. Некалькі вершаў паэту нават давялося чытаць на біс.
У другой палове сустрэчы чытаў Уладзь Лянкевіч, які завітаў з Мінска. Аўтар прадставіў сваю кнігу “70% вады”, пачытаў з яе і колькі зусім свежых тэкстаў. У паўзах між тэкстамі разгарнулася дыскусія на вечную тэму: форма-змест. Той-сёй акуартна намякаў на фармалізм Лянкевіча, які ў сваю чаргу аджартоўваўся: маўляў, чытайце мяне штодзень, і сэнсы праявяцца.
Калі дайшлі да розыгрышу невялікіх сувеніраў ад кампаніі “Будзьма беларусамі!”, то ад прэтэндэнтаў на званне аўтара найлепшага пытання не было адбою. Што ні голас, то дасціпны!
Здаецца, што часам гэткага імпэту і жывасці не хапае ў нардычна-абыякавай мінскай публікі.
