Другі альбом беларускага рэпера не расчараваў. Музыка менскіх падваротняў ды прыгарадных электрычак прыйдзецца даспадобы тым, хто шануе сумленна зроблены творчы прадукт.
Murovei — яшчэ адзін наш выканаўца, які сьведчыць пра “беларускі музычны цуд”, зьяву, якой не перастаюць дзівіцца на постсавецкай прасторы. Пасьля ўдалага сольнага старту ў выглядзе альбому “Сольный” Антось запісаў новую працу, у якой сьведчыць пра бясконцасьць свайго слоўнікавага запасу ды арыгінальных музычных задум.
У адрозьненьне ад папярэдняй працы, тут Murovei зьвярнуўся па дапамогу да калегаў — большасьць трэкаў альбому запісаная ў супрацы ці пры ўдзеле іншых рэпераў, у тым ліку з Ф’юзам зь дзіка шанаванай у рэп-асяродку піцерскай фармацыі Crec (трэк “Лёд”) ды сваім паплечнікам Дамадам, зь якім пачынаў у гурце Slozhnie (трэк “Пике”). За кошт немалой колькасьці гасьцей рэліз атрымаўся вельмі стракатым і няроўным з настрою і нагадвае хутчэй складанку, дзе Murovei — усяго толькі адзін з пэрсанажаў. Затое ў музычным пляне ўсё вытрымана дасканала ў межах абранага стылю, па якім і пазнаецца выканаўца, — нетаропкая, разважлівая і трохі неахайная чытка пад сакавітыя псыхадэлічныя біты.
Уласна, тое, што робіць Murovei, і ёсьць сапраўдны сумленны рэп, якога сёньня і са сьвечкаю ня знойдзеш. У час усеагульнага захапленьня чыткай ён знаходзіцца па-за трэндам, бо занадта ўжо ў яго выходзіць глыбока і змрочна ў піку масавым густам і ўсім гэтым рэп-прафанацыям, якімі поўніцца музычная прастора. Альбом “Киллер” ня мае мэты пазабаўляць, хутчэй ён зьнясільвае пры праслухоўваньні. Тут няма вылузваньня і пантоў, тут ёсьць спроба пісьменна аформіць сваё сьветаўспрыманьне. Вельмі ўдала перадае настрой альбому кліп на “Белую ворону”, бадай што самы ўдалы трэк з альбому.
Музыка менскіх падваротняў ды прыгарадных электрычак прыйдзецца даспадобы тым, хто шануе сумленна зроблены творчы прадукт. Без сумневу, гэтая праца мае сваю непаўторную аўру — у гэтых трэках апяваецца гарадзкая рамантыка, якой уласьцівая непераадольная туга, такая сабе “адзінота на стадыёне” (Адам Глёбус).
Спампаваць рэліз можна на Rap.ru
Ідэя: 7
Выкананьне: 8
Тэксты: 7
Запіс: 7
Аздабленьне: 8
Сяргей Будкін