У пятніцу, 23 лютага, у віцебскім абласным краязнаўчым музеі адкрываецца выстава ручнікоў і посцілак «Матуліны кросны» з музейных фондаў.
Дата: 23 лютага
Час: 16.00
Месца: Ратуша, вул. Леніна, 36, Віцебск
Выстава прэзентуе калекцыю ручнікоў і пакрываў (посцілак) гісторыка-этнаграфічнага рэгіёна Паазер’я, а таксама абрусаў, спальных прылад, прадметаў адзення, вырабленых уручную на ткацкіх станках (больш за 200 прадметаў).
Можна пабачыць і сельскагаспадарчыя прылады працы для апрацоўкі ільну, вырабу тканіны, а таксама элементы інтэр’ера сялянскай хаты і фотаздымкі другой паловы XIX — пачатку XX стагоддзяў, якія ілюструюць сялянскую працу і побыт.
У экспазіцыі — асноўныя тыпы ручнікоў Віцебшчыны: полацкія, віцебскія, усходне-віцебскія, стараверскія, ручнікі пагранічных з Падняпроўем і Паняманнем раёнаў, пазарэгіянальныя ручнікі — прадметы двухнітавага, бранага, выбарнага, шматнітавага, ажурнага, пераборнага ткацтва.
Прымяненне ручнікоў і посцілак ў побыце адлюстравана ў рэканструяваным інтэр’еры сялянскай хаты, дзе можна пабачыць ручнік-«набожнік», вясельны ручнік, ручнік-«уціральнік», «трапкач» і інш.
Падчас адкрыцця выставы выкладчыкі і навучэнцы Віцебскага тэхналагічнага каледжа пакажуць працэс ткацтва на сучасных кроснах, а госці атрымаюць магчымасць далучыцца да ручнога вырабу тканіны.
Выстава будзе працаваць да 31 траўня.
Кошт квіткоў: 4 рублі — дарослы, 2 рублі — школьнікі / студэнты.
