У свой час адзін з наймацнейшых міжнародных тэатральных фестываляў Беларусі ў гэтым годзе цягне хіба што на статус «саюзнага», паведамляе «Наша Ніва». Сёлетні магілёўскі фестываль пройдзе з 20 па 27 сакавіка. У анонсе завабліваюць тым, што гледачоў чакае «17 магутных пастановак з Беларусі, Казахстана і Расіі».

Па факце з Расіі спектакляў будзе больш за ўсё, а з Казахстана заяўлены толькі адзін. Ды і прыедзе да нас Драматычны тэатр імя Дастаеўскага з горада Сямей з чэхаўскімі вадэвілямі.

Афіша Март-кантакта-2026. Крыніца: mdrama.by

Тэатры з Расіі таксама няроўна дыхаюць да Чэхава, таму гледачоў чакае і «Чайка», і «Дама з сабачкам». А яшчэ, напрыклад пушкінская «Пікавая дама» і «Яўген Анегін». Дарэчы, пры жаданні смаленскую «Пікавую даму» можна будзе параўнаць з варыянтам бачання з Гродна — абедзве пастаноўкі з узроставым цэнзам 16+, але замежная каштуе больш.

Не абыдзецца і без вайсковай тэмы — за гэта найперш адказныя госці з Ульянаўска з пастаноўкай «Заўтра была вайна». Рэлігійную ж тэматыку падыме Уладзімірскі тэатр драмы — тут вам і іконы, і духоўнае прасвятленне на базе аповедаў рускага пісьменніка Уладзіміра Салавухіна.

Сапраўднай перлінай фэста можна лічыць прывоз «Хутара» з Беларускага тэатра лялек, пастаўленага рэжысёрам Яўгенам Карнягам па «Знаку бяды» Васіля Быкава. У Мінску ў гэты тэатр прабіцца заўсёды няпроста, таму гэта цудоўная магчымасць для некаторых жыхароў Магілёва пабачыць яго раней за мінчукоў.

Кошт фестывальных квіткоў стартуе ад 25 рублёў.