Завяршыўся першы летні рэаліці-конкурс гарадскіх праектаў #РазамМінск. Амаль два месяцы каманды гарадскіх актывістаў працавалі над паляпшэннем гарадской прасторы сталіцы і жыцця мінчан. 18 верасня лепшыя ініцыятывы атрымалі свае заслужаныя ўзнагароды. Арганізатарамі конкурсу выступілі грамадская некамерцыйная платформа Talaka.by, кампанія velcom і інтэрнэт-партал Onliner.by.
Цырымонію ўзнагароджання адкрыў крэатыўны дырэктар платформы для рэалізацыі сацыяльна значных праектаў Talaka.by Іван Ведзенін: «Мы задумалі гэты конкурс, каб узварушыць мінчан у летні перыяд. Звычайна летам людзі з’язджаюць у адпачынак, на вакацыі, на дачы, жыццё замірае. Мы хацелі паказаць, што летнія месяцы можна выдаткаваць з карысцю для горада, зрабіць нешта значнае».
«Першы конкурс #РазамМінск атрымаўся! – адзначыў на цырымоніі ўзнагароджання начальнік аддзела карпаратыўных камунікацый кампаніі velcom Вячаслаў Смірноў. – Абраны фармат рэаліці-шоў прыцягнуў вялікую ўвагу аўдыторыі. Рэпартажы ў СМІ зрабілі конкурс папулярным, і цікавасць гледачоў не слабела ад пачатку да самага канца. Яшчэ на адборачным этапе было агучана шмат вельмі яркіх ідэй. І хай не ўсе праекты пакуль удалося рэалізаваць, кожны з іх атрымаў сваю долю ўвагі і зарад упэўненасці ў сваіх сілах».
Усяго арганізатары атрымалі больш за 300 ідэй, якія прэтэндавалі на ўдзел у конкурсе. Пасля афармлення іх у выглядзе праектаў на платформе Talaka.by і адбору журы ў асноўны этап конкурсу трапілі 23 каманды. Прыкладна палова з іх (11 каманд) завяршылі свае пачынанні ва ўстаноўлены тэрмін і атрымалі магчымасць пазмагацца за прызавы фонд памерам $2000.
Лёс паловы прыза павінна было вызначыць кампетэнтнае журы. Меркаванні яго сяброў падзяліліся, таму было вырашана ў намінацыі «Лепшы гарадскі праект» абраць адразу двух пераможцаў: «Добраўпарадкаванне вадаёма па вул. Купрэвіча» і «Музей рэтракамп’ютараў». Абодва праекта атрымалі ў якасці ўзнагароды па $500.
«І чыстая сажалка з качачкамі, і рэтракамп’ютары – гэта важна. У першым выпадку размова ідзе пра мясцовую супольнасць, якая ператварае наш горад, робіць яго лепш; у другім – пра ўнікальную для Мінска з’яву. Таму журы вырашыла, што прыз трэба падзяліць», – патлумачыў Іван Ведзенін.
У другой пераможнай намінацыі – «Выбар мінчукоў» – перавага апынулася на баку аднаго праекта. Чэк на суму $1000 атрымала каманда праекта «Чыстая справа», якая перамагла ў галасаванні гледачоў. Чацвёра студэнтаў арганізавалі ў мінскіх школах экалагічныя заняткі і ўсталявалі 60 скрыняў для паасобнага збору смецця. Праект атрымаў шырокую падтрымку і ў будучыні будзе пашыраны.
Яшчэ адна інтрыга вырашылася прама на цырымоніі: спецыяльныя прызы ўручылі арганізатары конкурсу.
Пераможцам у спецыяльнай намінацыі «Дзіцячы горад» ад кампаніі velcom стаў праект «Гарадскія квэсты для дзяцей і іх бацькоў». Аўтарам праекту былі ўручаны падарункі ад velcom – шматфункцыянальны планшэт і наборы для сямейных пікнікоў.
Платформа Talaka.by таксама заснавала ўласную спецнамінацыю – «Сацыяльны прадпрымальнік». Перамогу ў ёй прысудзілі праекту «Чыстая справа». Удзельнікі каманды атрымалі магчымасць карыстацца офісам і ўсімі рэсурсамі платформы Talaka.by. Акрамя таго, адзін член каманды будзе рэкамендаваны да ўдзелу ў трэнінгу па прадпрымальніцтву ў Германіі.
Летні рэаліці-конкурс #РазамМінск стаў першым удалым вопытам супрацоўніцтва трох суб’ектаў: бізнесу, некамерцыйнай платформы і буйнога СМІ. Арганізатары спадзяюцца паўтарыць яго ў наступным годзе.
