У Ружанскім палацы адчынілася выстава «Нябёсная варта Беларусі», якая прадстаўляе калекцыю абразоў праекта «Куфар старажытнасцяў» (прыватны збор музеязнаўца, экскурсавода Паўла Каралёва).
Хрыстос, Багародзіца, святы Мікола, Юрый Пераможца — нябёснае войска, на якое спадзяваўся беларускі народ у цяжкія часы выпрабаванняў. Да абразоў, якія прадстаўлены зараз на выставе, больш за сотню гадоў звярталіся з самымі патаемнымі думкамі і просьбамі нашы продкі.
Асаблівасць праекта ў тым, што экспануюцца і ліштвы — мастацкі элемент вонкавага аздаблення сялянскай хаты. Ліштвы былі перавезены з вёскі Кудрычы Пінскага раёна, якая славіцца наяўнасцю яшчэ саламяных стрэхаў на дамах.
Можна сцвярджаць, што абразы і ліштвы — уратаваная спадчына. Многія з твораў знаходзіліся ў кепскім стане, аднак праведзеныя ратавальныя мерапрыемствы дазволілі вярнуць і падкрэсліць прыгажосць беларускага мастацтва.
Праект «Куфар старажытнасцяў» дзякуе за магчымасць паказаць калекцыю ў прасторы музейнага комплекса Ружанскага палаца. Гаспадары палаца, Сапегі, з даўніх часоў, таксама зберагалі і калекцыянавалі ўнікальныя зборы.
Выстава дзейнічае да 30 красавіка 2022 года. Пасля праект будзе мець працяг. Запрашаем усіх ахвочых да супрацы дзеля ратавання беларускай спадчыны. Вы таксама можаце перадаць розныя рэчы (прадметы з гісторыяй) для захавання і папулярызацыі.