Калі вы раптам яшчэ не вызначыліся, як цікава і з карысцю правесці выходныя, мы падкажам. Майстар-клас, супольныя спеўкі, танцы, квэст, канцэрты і гуканне вясны — выбірайце мерапрыемствы ў сваім горадзе і на свой густ!
Крыніца: freepik.es
Беларусь
Полацк
Традыцыйныя танцы з гуртом «Варган» у Полацку
Развучыце беларускіх традыцыйных танцаў ды паскочыце ў асалоду пад жывую музыку!
Гомель
Майстар-клас па вырабе андарака ў Гомелі
У нядзелю, 19 сакавіка а 14-й, у філіяле Веткаўскага музея — круты майстар-клас па вырабе андарака.
Супольныя спеўкі ды этнафільмы ў Гомелі
У суботу, 18 сакавіка, у філіяле Веткаўскага музея — кінапрагляд і спеўкі! Завітвайце! Будзе цікава!
Літва
Вільня
Квэст «Нашаніўскія легенды» ў Вільні
У нядзелю, 19 сакавіка, каманда ULegend ладзіць круты квэст «Нашаніўскія легенды» па беларускіх мясцінах Вільні, прысвечаны дзеячам Нашаніўскай пары і Беларускай Народнай Рэспублікі.
Гурток «Беларускі народны строй» у Вільні
Гэтым разам тэма — «Строй. Што гэта і што павінна ў ім быць». Вы пазнаёміцеся з традыцыйным кроем і спосабамі аздаблення вышыўкай, стужкамі і інш. Будзе і практыка — вышыўка процягам.
Польшча
Беласток
Традыцыйныя беларускія танцы ў Беластоку
Тут вучаць і танчаць беларускія традыцыйныя танцы пад дуду і электронныя запісы. «Верабей», «Млын», «Мяцеліца», полька-бабка — адурэць колькі ўсяго вашым ножкам танчыць! Прыходзьце, нават калі вы ніколі не танцавалі. Калі вы любіце беларускую культуру. Калі цікаўныя, як ужывую гучыць дуда. Калі хочаце адпачыць напрыканцы тыдня ў добрай кампаніі.
Варшава
«Агу, вясна!» з Сержуком Доўгушавым у Варшаве
У нядзелю, 19 сакавіка, у Музеі Вольнай Беларусі — этнаімпрэза для дзетак і іх бацькоў «Агу, вясна!» з вядомым фалькларыстам Сержуком Доўгушавым і музыкам Андрэем Еўдакімавым. Адмысловыя госці — дзявочы гурт «Hajouki».
Вялікабрытанія
Лондан
Гуканне вясны ў Лондане
Прыходзьце і прыводзьце дзетак спяваць вяснянкі, вадзіць карагоды і гуляць у гульні. Апранайцеся ў народныя строі і прыносьце з сабой выпечку і пітво. Няхай адыходзіць зіма, набірае сілу вясновае сонца, і святло рассейвае змрок!
Чэхія
Прага
Супольныя спеўкі пад Прагай
У суботу, 18 сакавіка, суполка «Золак» запрашае ўсіх навучыцца спяваць беларускія веснавыя народныя песні і такім чынам падрыхтавацца да хуткага гукання вясны!
Грузія
Тбілісі
Iva Sativa ў Тбілісі
18 сакавіка (гэта будзе субота) гукаць вясну ды шаманіць едзе ў Тбілісі вядзьмарка Iva Sativa, варажбітка фольк-хопу!
