У Вільні хутка адкрыецца для наведвальнікаў палац Сапегаў, пабудаваны ў XVII ст., піша Delfi. Сцены палаца памятаюць не толькі Сапегаў і іх гасцей, але і ваенных напалеонаўскай арміі, пацыентаў бальніцы, якая знаходзілася тут.
Леў Сапега
Палац рэстаўравалі на працягу 5 гадоў, тут з’явіцца новая культурная прастора, якой будзе кіраваць Цэнтр сучаснага мастацтва.
Чытайце яшчэ:Беларускія мясціны Вільні: Палацы славутых родаў
Кіраўнік цэнтра Кястуціс Куйзінас запэўніў, што тут не будзе другога Цэнтра сучаснага мастацтва.
«З улікам асаблівасцей будынка, спецыфікі яго архітэктуры, месца, дзе знаходзіцца будынак, — гэта вельмі розныя аб’екты. Цэнтр сучаснага мастацтва — гэта ідэальны белы куб, у якім заўсёды можна рабіць, што хочаш, пачынаць з чыстага ліста, а тут трэба шукаць гармонію з будынкам», — сказаў Куйзінас.
Кіраўніком палаца Сапегаў прызначаная Гінтаўце Жамойцітэ. Яна выказала надзею на тое, што гэты новы будынак узбагаціць культурнае жыццё новымі ідэямі, дазволіць іншым спосабам спазнаць мастацтва, убачыць спадчыну ў іншым святле.
У ходзе рэстаўрацыі будынка было вырашана пакінуць адкрытымі розныя архітэктурныя пласты, якія нагадваюць пра яго маляўнічую гісторыю.
Палац будзе адчынены для наведвальнікаў з 12 красавіка 2024 года.
Сапегі — шляхецкі род герба «Ліс», які ў XVI ст. увайшоў у лік магнатэрыі. Прадстаўнікі роду Сапегаў у XV-XVIII стст. валодалі буйнымі зямельнымі ўладаннямі і мелі значны ўплыў — займалі найвышэйшыя дзяржаўныя, адміністрацыйныя і вайсковыя пасады. Сапегі лічыліся другім па значнасці пасля Радзівілаў магнацкім родам ВКЛ.
Глядзіце яшчэ:
Магнаты Беларусі і Украіны
