Фрылансерам таксама трэба працаваць, а пастаяннае сядзенне дома можа выклікаць толькі радыкуліт. Дзе яшчэ можна папрацаваць з добрым кубкам кавы? Працягваем нашу рубрыку пра месцы для фрылансераў!
Cёння дарога павяла мяне далей ад плошчы Якуба Коласа, якая ўжо надакучыла, у бок абеліска нашага горада – плошчы Перамогі, якая раней мела больш празаічную назву Круглая. Дзень у самым разгары – найлепшы час папрацаваць. У вочы мне кінулася прыгожая шыльда “Coffee & kava”. Паколькі назва сугучная з нашай рубрыкай, выбар гэтым разам відавочны. Наколькі гэтае месца freelance-friendly?
Месцазнаходжанне
За хвіліну ад станцыі метро “Плошча Перамогі” – выдатнае месца ў самым цэнтры, нічога не трэба шукаць! Таксама варта адзначыць блізкасць ад прыпынку 100-га аўтобуса, які можа даставіць у любое месца ўздоўж галоўнага праспекта Менска. На жаль, каб дабрацца ў больш “глыбокія” месцы, давядзецца перасаджвацца ці крыху прагуляцца да найбліжэйшых прыпынкаў тралейбусаў і аўтобусаў, што за 10-15 хвілінаў хуткім крокам ад гэтай кавярні.
За добрае месца ў цэнтры – кубак кавы!
Кава/гарбата
Назва кавярні кажа сама за сябе – выбар даволі разнастайны. Тут можна замовіць не толькі стандартныя эспрэса, амерыкана, латэ і капучына, але і раф, флэт-уайт, мока, а таксама айс-латэ. Таксама важна зазначыць, што ў капучына, амерыкана латэ і эспрэса ёсць падвоеныя порцыі. Нельга сказаць, што яны велізарныя, але на працу мусіць хапіць. Апроч кавы тут ёсць глінтвейны, смузі, фрэшы і малочныя кактэйлі.
З ежы тут ёсць сняданкі, бургеры і дэсерты, але гэта ўжо традыцыйна мае сярэдні па горадзе кошт.
За добры выбар – кубак кавы!
Цэны
Стандарт па горадзе – кава ад 2,5 да 5 рублёў. Смузі, фрэшы і малочныя кактэйлі каштуюць у дыяпазоне 4,5 – 5,5 рублёў. Але калі цэны на напоі нічым не здзіўляюць, то сняданак сапраўды парадаваў! На выбар блінчыкі, каша, круасаны ці мюслі + какава, кава і гарбата абыдзецца вам усяго ў 4,5 рублі! Сапраўдны прыклад эканоміі! Бургеры тут каштуюць 4,9 рубля, але наўрад ці яны вас здзівяць памерамі. Пра дэсерты, як звычайна, лепш прамаўчаць, бо 2,5 за эклер і торцікі за 3-5 рублёў/кавалак – не самая шчодрая прапанова. Але ж для працы гэта не самае галоўнае, праўда?
За выбар і нядрэнныя цэны – кубак кавы.
Разеткі
Упершыню я з жалем кажу, што з зарадкай гаджэтаў тут могуць быць складанасці. Разеткі ёсць каля літаральна пары столікаў, але і да тых будзе цяжка дабрацца. Таму адразу раю браць цалкам зараджаны ноўтбук ці планшэт, інакш вас можа напаткаць не самы прыемны сюрпрыз.
За такую сумную сітуацыю – ніякай кавы!
WI-FI
Халяўны інтэрнэт ёсць, але ён працуе праз белтэлекамаўскую аўтарызацыю. Гэта азначае, што вам давядзецца ўводзіць свой нумар тэлефона і чакаць смс з кодам. Але нават калі вы атрымаеце доступ, то не спадзявайцеся на спампоўкі і прагляды відэа ў высокай якасці, бо хуткасць, мякка кажучы, прасядае. Магчыма, гэта вылкікана вялікай колькасцю падключэнняў, але шчыра – для нас гэта не апраўданне!
За сеціва – палова кубка кавы!
Прыбіральня
Тут стандарт – усё ў наяўнасці. Ёсць хітрасць – прыбіральня з кодавым замком, але пароль ахвотна падкажа барыста. За наяўнасць – відавочна кубак кавы.
Час працы
Зноўку не засядзішся – кавярня працуе да 23.00. Але для жаваранкаў прыемныя навіны, бо сюды па каву і працу можна прыходзіць ажно з 8 ранку!
За ранні пачатак – кубак кавы!
Атмасфера і інтэр’ер
Тыповая, але з густам упрыгожаная кавярня па еўрапейскім ўзоры не выклікае раздражнення і дадае пэўнай лямпавасці гэтаму месцу. Музыка не раздражняе, грае вельмі ціха, таму яе можна нават не заўважаць. Памеры столікаў і сядзенні вельмі зручныя для працы, што таксама вялікі плюс. Таму хутчэй за ўсё месца вам спадабаецца сваёй атмасферай.
За прыемную атмасферу і інтэр’ер – кубак кавы.
Забіць нельга памілаваць. Ставім канчатковую коску
Coffee & kava можна было б назваць адным з самых аптымальных для працы варыянтаў, але 10% зараду на маім планшэце і страх недапісаць артыкул усё ж вымушаюць сказаць, што калі ў вас слаба трымае батарэя працоўнага гаджэта ці ён ужо падсеў, лепш шукайце іншае месца.
6,5/8 кубкаў кавы
Дайце нам разетак, і мы вас будзем любіць! Для фрылансераў з пераноснымі батарэямі.
Глядзі таксама:
Праца ці кава. Wake up cafe
Праца ці кава. “Старыя традыцыі”
Багдан Сакалоў
